ketaki mategaonkar : दिल्ली-एनसीआर परिसरात गेल्या काही दिवसांत भटक्या कुत्र्यांच्या हल्ल्यांमुळे अनेकजण जखमी झाले आहेत. कुत्र्यांच्या हल्ल्यांच्या वाढत्या घटनांमुळे सर्वोच्च न्यायालयाने महत्त्वाचा निर्णय घेत, सर्व भटक्या कुत्र्यांना ८ आठवड्यांच्या आत पकडून प्राणी निवारा केंद्रात ठेवण्याचा आदेश दिला आहे.

हा निर्णय आल्यानंतर प्राणीप्रेमी आणि अनेक कलाकारांनी नाराजी व्यक्त केली आहे. मराठी इंडस्ट्रीतील लोकप्रिय गायिका केतकी माटेगावकर हिने सोशल मीडियावर व्हिडिओ शेअर करून या निर्णयावर तीव्र नाराजी व्यक्त केली. हा व्हिडिओ शेअर करताना केतकी इतकी भावुक झालीआणि तिच्या डोळ्यांत अश्रू आले.

“मी Dog Mother आहे… जे सुरू आहे ते क्रूर आहे”

व्हिडिओमध्ये केतकी म्हणाली, “एका श्वानाची आई (Dog Mother) या नात्याने मी सांगतेय, जे काही सुरू आहे ते अत्यंत क्रूर आहे. काही जण माझ्याशी सहमत नसतील, पण सध्या जे व्हिडिओ समोर येत आहेत, त्यात कुत्र्यांना पकडून ट्रकमध्ये फेकलं जातं, पोत्यात भरलं जातं, हे अत्यंत वेदनादायी आहे. अशा प्रकारे जर माणसांना त्रास दिला गेला तर चालेल का? हिटलरने लोकांना त्रास दिला, ते योग्य होतं का? लसीकरण करा, उपचार करा, पण कृपया ते योग्य पद्धतीने करा.”

कुत्र्यांच्या स्वभावाविषयी केतकीचं मत

“कुत्र्यांच्या अंगावर भरपूर केस असतात कारण ते सतत बाहेर राहतात, त्यांची शारीरिक रचना तशीच आहे. ते घरात ठेवले तरी त्यांना बाहेर जायला आवडतं. माझ्याकडेही एक Dog आहे, मी श्वानप्रेमी असल्यामुळे त्याला घरी आणलं, पण त्याला इतर श्वानांना भेटायला, बाहेर धावायला आवडतं. रेबिजसारखे आजार टाळण्यासाठी निर्णय घेतला असेल हे मला कळतं, पण यात काहीतरी बॅलन्स असला पाहिजे.”

“सेफ शेल्टर कुठे आहे?”

“ज्या श्वानांना पकडून ठेवणार आहात ते ‘सेफ शेल्टर’ नेमकं कुठे आहे? तेथे मोकळी जागा, चांगले वातावरण आणि त्यांची काळजी घेणारी माणसं असतील का? आतापर्यंत समोर आलेले फुटेज पाहून वाटतंय की त्यांच्याशी फार वाईट वागणूक दिली जातेय. फक्त एवढंच म्हणेन, त्यांच्याशी प्रेमाने वागा.”

इतर कलाकारांचाही विरोध

केतकीप्रमाणेच बॉलिवूडचे जॉन अब्राहम, जान्हवी कपूर, वरुण धवन आणि वीर दास यांनीही या आदेशाविरोधात नाराजी व्यक्त केली आहे.