Muralidhar Mohol : नव्याने निवडून आलेल्या नवीन सदस्यांना मदतीची गरज असते. अशा वेळी कुटुंबातील सदस्यांनी मदत करावी. मात्र, ही मदत करताना आपण कोणाशी बोलतो, काय बोलतो, याचे भान ठेवावे नगरसेविकांना आपली कामे करू द्यावीत, अशा शब्दांत खासदार आणि केंद्रीय मंत्री मुरलीधर मोहोळ यांनी महापालिकेतील नवीन सदस्यांचे कान टोचले आहेत. २०१२ ते २०१७ या कालावधीत पत्नी नगरसेवक असताना आपण स्वत: कधीही महापालिकेत गेलो नसल्याचे उदाहरणही या वेळी खासदार मोहोळ यांनी दिले. महापालिकेत काम करताना प्रभाग म्हणून नाही, तर शहर म्हणून विचार करावा, अशा सूचनाही त्यांनी केल्या. महापालिकेतील भाजपच्या गटनेते निवडीसाठी पक्षाच्या नवनिर्वाचित सदस्यांची बैठक मंगळवारी बोलविण्यात आली होती. या वेळी ही सूचना केल्याचे सूत्रांकडून सांगण्यात आले. दरम्यान, या बैठकीत गटनेता निश्चित करण्यात आला नसला, तरी येत्या शुक्रवारी पक्षाकडून विभागीय आयुक्तांकडे गटनोंदणी करून त्या वेळी नाव जाहीर केले जाणार आहे. शहराध्यक्ष धीरज घाटे यांच्यासह पक्षाचे पदाधिकारी या वेळी उपस्थित होते. काही दिवसांपूर्वी भाजपच्या एका नवर्निवाचित महिला उमेदवाराच्या पतीने क्षेत्रीय कार्यालयात अधिकाऱ्यांची बैठक घेतली, तसेच या बैठकीत अधिकाऱ्यांनी आपल्याला दररोज माहिती देण्याच्या सूचना केल्याचा व्हिडिओ सोशल मीडियावर व्हायरल झाला होता. त्यानंतर आता भाजपच्या नवनिर्वाचित सदस्यांच्या बैठकीत याबाबत स्पष्ट सूचना देण्यात आल्या आहेत.
