– विजय डेरवणकर
ZP School – रायगड जिल्ह्यातील जिल्हा परिषद शाळांमध्ये जून महिन्यापासून शालेय पोषण आहारासाठी लागणारे धान्य माल उपलब्ध नसल्याची माहिती समोर आली आहे. त्यामुळे जिल्हा परिषद शाळांमध्ये शिक्षण घेणाऱ्या विद्यार्थ्यांना पोषण आहारापासून वंचित राहावे लागत असल्याचे सांगितले जात आहे.

विद्यार्थ्यांच्या आरोग्याशी आणि पोषणाशी संबंधित महत्त्वाचा प्रश्न निर्माण झाल्याने पालक आणि नागरिकांमध्ये चिंता व्यक्त होत आहे. शालेय विद्यार्थ्यांना शिक्षणाबरोबरच सकस आहार मिळावा, विद्यार्थ्यांची शाळेतील उपस्थिती वाढावी आणि आर्थिकदृष्ट्या दुर्बल कुटुंबातील विद्यार्थ्यांना पोषणयुक्त आहार मिळावा, या उद्देशाने शालेय पोषण आहार योजना राबविण्यात येते.

मात्र शैक्षणिक वर्ष सुरू होऊन दीड महिना झाला, तरीही अनेक शाळांमध्ये पोषण आहारासाठी आवश्यक साहित्य उपलब्ध नसल्याची तक्रार आहे. ग्रामीण भागातील जिल्हा परिषद शाळांमध्ये आर्थिकदृष्ट्या दुर्बल कुटुंबांतील विद्यार्थ्यांची संख्या मोठी आहे. त्यामुळे शाळेत मिळणारा पोषण आहार विद्यार्थ्यांसाठी महत्त्वाचा ठरतो.

अशा परिस्थितीत पोषण आहाराचा पुरवठा खंडित झाल्यास त्याचा थेट परिणाम विद्यार्थ्यांच्या दैनंदिन आहारावर होण्याची शक्यता आहे. जिल्ह्यातील अनेक शाळांना पोषण आहारासाठी लागणारे धान्य आणि अन्य साहित्य वेळेत मिळाले नसल्याची माहिती सूत्रांकडून मिळाली आहे. त्यामुळे शाळा प्रशासनासमोरही अडचणी निर्माण झाल्या आहेत.

विद्यार्थ्यांना नियमित पोषण आहार देण्यासाठी आवश्यक असलेला साठा उपलब्ध नसल्याने शिक्षक आणि मुख्याध्यापकांनाही प्रशासनाकडे पाठपुरावा करावा लागत असल्याचे सांगितले जाते. शालेय पोषण आहार योजनेत पुरवठ्याचे योग्य नियोजन आवश्यक आहे. शैक्षणिक वर्ष सुरू होण्यापूर्वीच आवश्यक धान्य व धान्यादी माल उपलब्ध होणे अपेक्षित असते. मात्र पुरवठा प्रक्रियेत विलंब झाल्याने विद्यार्थ्यांना त्याचा फटका बसत असल्याचे पालकांचे म्हणणे आहे.

तातडीने पुरवठा सुरू करण्याचे आश्‍वासन
या प्रकाराबाबत पंचायत समिती कर्जतचे गटशिक्षणाधिकारी अनंत खैरे यांनी प्रशासनाची भूमिका स्पष्ट केली आहे. रायगड जिल्हा परिषदेच्या शिक्षणाधिकाऱ्यांनी संबंधित पुरवठादाराला पोषण आहाराचा पुरवठा करण्याचे आदेश दिले आहेत. दोन दिवसांत शाळांमध्ये धान्य आणि धान्यादी माल टाकण्यास सुरुवात होईल,

असे त्यांनी सांगितले. पोषण आहाराचा करारनामा झालेला आहे. त्यामुळे पुरवठा सुरू करण्याची प्रक्रिया पूर्ण झाली असून, येत्या दोन दिवसांत शाळांमध्ये साहित्य पोहोचण्याची शक्यता आहे. त्यामुळे सध्या निर्माण झालेली अडचण लवकरच दूर होईल, असा विश्वास शिक्षण विभागाकडून व्यक्त करण्यात आला आहे.