दोन्ही नाईक निंबाळकर घराणी निवडणुकीच्या रिंगणातून गायब; राजकीय इतिहासात प्रथमच समर्थकांमध्ये थेट लढत.
ZP Election 2026 – जिल्हा परिषद व पंचायत समितीच्या आजच्या शेवटच्या दिवशी कोळकी गटातून अचानक घडामोडी घडत राष्ट्रवादी काँग्रेसमध्ये नुकताच प्रवेश केलेल्या सह्याद्री चिमणराव कदम यांनी कोळकी गटातून जिल्हा परिषदेला उमेदवारी मिळणार नसल्याने शिवसेनेत प्रवेश करीत ऐनवेळी उमेदवारी मिळवली. फलटण तालुक्यातील एकमेव खुला गट आहे.

कोळकी गटातून जिजामाला रणजितसिंह नाईक निंबाळकर विरुद्ध संजीवराजे किंवा शिवांजलीराजे नाईक निंबाळकर अशी दोन्ही घराण्यांतील व्यक्तींमध्ये लढत होईल, शी चर्चा होती. मात्र, रणजितसिंह नाईक निंबाळकर यांनी भाजपचे जिल्हा सरचिटणीस जयकुमार शिंदे यांना तर रामराजे नाईक निंबाळकर अर्थात शिवसेनेने सह्याद्री कदम यांना उमेदवारी दिली आहे.

शेवटच्या क्षणी अनेक ठिकाणी सर्वच पक्षांतील उमेदवारांनी बंडखोरी केली असून आता सर्वांच्या नजरा माघारी कोण कोण घेणार याकडे लागल्या आहेत. ही लढत भाजप व शिवसेना या दोन पक्षांतच होणार असली तरी तिसरी आघाडी करीत राष्ट्रवादी काँग्रेस शरद पवार पक्ष, शिवसेना (ठाकरे) आणि रासप, वंचित बहुजन आघाडी यांनी चुरशीने अनेक ठिकाणी उमेदवारी अर्ज दाखल केलेले आहेत.

जिल्हा परिषद गट तरडगाव ६, साखरवाडी ६, विडणी ७, गुणवरे ७, बरड १२, कोळकी ८, वाठार निंबाळकर १२, हिंगणगाव ५ असे एकूण ६३ अर्ज प्राप्त झाले आहेत. पंचायत समितीच्या पाडेगाव गण ६, तरडगाव ४, साखरवाडी ९, सस्तेवाडी १४, सांगवी ४, विडणी १५, गुणवरे ६, आसू ६, बरड ८, दुधेबावी ७, कोळकी ६, जाधववाडी ४,

वाठार निंबाळकर १०, सुरवडी ११, सासवड ६, हिंगणगाव ३ असे एकूण ११९ अर्ज प्राप्त झाले आहेत. अर्ज दाखल करत असताना जोरदार शक्तिप्रदर्शन करण्यात आले. यावेळी मोटार फेरी, पदयात्रा काढत बँड व पारंपारिक खेळ, लेझीम, हलगी, तुतारीच्या पथकाने नागरिकांचे लक्ष वेधून घेतले. त्यामुळे फलटण शहरासह सिटी बिल्डिंग परिसरात मोठ्या प्रमाणात गर्दी झाल्याने यात्रेचे स्वरूप आले होते.

दोन्ही नाईक निंबाळकर घरांचीनिवडणूक मैदानात अनुपस्थिती
फलटण तालुक्याच्या राजकारणात गेल्या काहीवर्षांपासून विधानपरिषदेचे माजी सभापती रामराजे नाईक निंबाळकर, जिल्हा परिषदेचे माजी अध्यक्ष संजीवराजे नाईक निंबाळकर यांच्या राजे गटाविरुद्ध माजी खासदार रणजितसिंह नाईक निंबाळकर यांच्यामध्ये संघर्ष होत आहे. लोकसभा, नंतर विधानसभा आणि नगरपालिका या सर्व निवडणुकांमध्ये या दोन्ही गटांच्या समर्थकांमध्ये लढती झाल्या.

पालिकेच्या निवडणुकीतही या नेत्यांच्या दोन्ही घरांमधील व्यक्ती निवडणूक रिंगणात होत्या. यावेळी मात्र प्रथमच जिल्हा परिषदे पंचात समितीच्या निवडणूक रिंगणात दोन्ही नाईक निंबाळकर घराण्यातील कोणीही उमेदवार नाहीत. यापूर्वी संजीवराजे नाईक निंबाळकर, शिवांजलीराजे नाईक निंबाळकर तसेच जिजामाला नाईक निंबाळकर यांनी जिलहा परिषदेचे प्रतिनिधित्त्व केले आहे. यावेळीही ही नेतेमंडळी रिंगणात सतील असा कयास होता. मात्र, यापैकी कोणीही थेट मैदानात उतरलले नाही.