Z Bridge Closed – दुरुस्तीच्या कारणासाठी कै. काकासाहेब गाडगीळ पूल (झेड ब्रिज) १० एप्रिल ते नऊ मे या कालावधीत रात्री ११ ते सकाळी सात या वेळेत वाहतुकीसाठी बंद राहणार आहे. उर्वरीत वेळेत तो खुला राहील. त्यामुळे नागरिकांनी रात्री पर्यायी मार्गांचा वापर करावा, असे आवाहन महापालिकेने केले आहे. जिल्हाधिकाऱ्यांनी दिलेल्या आदेशानुसार मागील वर्षी पावसाळ्यानंतर महापालिका हद्दीतील सगळ्या उड्डाण पुलांचे स्ट्रक्चरल ऑडिट केले होते. त्यानंतर १७ पुलांच्या दुरुस्तीचे काम हाती घेतले होते. त्यातील प्राधान्य असलेल्या पुलांचे काम दोन-तीन महिन्यांपूर्वी सुरू केले असून, त्यात खडकवासला पूल, कृषी महाविद्यालय येथील पूल, संभाजी पूल, दांडेकर पूलांचा समावेश आहे. हे काम पूर्ण झाले आहे. दुसऱ्या टप्प्यातील पुलांच्या दुरुस्तीच्या कामांना आता सुरुवात झाली असून, प्रथमत: गाडगीळ पूल दुरुस्तीसाठी घेतला जाणार आहे. या पुलाचीही एक्स्पान्शन जाॅइंट आणि बेअरिंग दुरुस्ती करायची आहे. वाहतूक पोलिसांशी समन्वय करून ही दुरुस्ती केली जाणार आहे. वाहतुकीचा खोळंबा होऊ नये, यासाठी दिवसभर वाहतूक सुरू ठेवून दुरुस्तीचे काम रात्री केले जाणार असल्याची माहिती महापालिकेतील प्रकल्प विभागप्रमुख दिनकर गोजारे यांनी दिली.
