बारामती : श्री सोमेश्वर सहकारी साखर कारखान्याच्या पंचवार्षिक निवडणुकीच्या पार्श्वभूमीवर राजकीय हालचालींना वेग आला असून, राष्ट्रवादी काँग्रेस शरदचंद्र पवार पक्षाकडून निवडणुकीसाठी इच्छुक उमेदवारांच्या मुलाखतींना आजपासून सुरुवात झाली. युवा नेते युगेंद्र पवार यांच्या उपस्थितीत बारामतीतील कृष्णानगर येथील हॉटेलच्या सभागृहात इच्छुक उमेदवारांच्या मुलाखती घेण्यात आल्या.

कारखाना निवडणुकीसाठी कोणत्या मतदारसंघातून कोणाला संधी द्यायची, इच्छुकांची स्थानिक पातळीवरील ताकद, सभासदांशी असलेला संपर्क, जनसंपर्क तसेच निवडणुकीची तयारी याबाबत उमेदवारांकडून माहिती जाणून घेण्यात आली. संभाव्य पॅनेलची रचना आणि उमेदवारी निश्चितीच्या दृष्टीने या मुलाखती महत्त्वाच्या मानल्या जात आहेत.

सोमेश्वर कारखान्याची निवडणूक प्रक्रिया सुरू झाल्याने विविध मतदारसंघांतील इच्छुकांमध्येही उत्सुकता वाढली आहे. मोठ्या संख्येने इच्छुकांनी निवडणूक लढविण्याची तयारी दर्शविल्याने उमेदवारी निश्चित करताना पक्षासमोर मोठे आव्हान राहणार आहे. ‘पवार विरुद्ध पवार’मध्ये रस नाही; बदलासाठी लढतोय

दरम्यान, सोमेश्वर कारखाना निवडणुकीबाबत युगेंद्र पवार यांनी आपली भूमिका स्पष्ट केली. “आम्हाला पवार विरुद्ध पवार असे करण्यात रस नाही. तसे होऊ नये, असेच आम्हाला वाटते. कुणाच्या विरोधात न लढता शेतकरी सभासदांसाठी सक्षम पर्याय उभा राहावा, म्हणून आम्ही लढत आहोत,” असे त्यांनी सांगितले. “सुनेत्रा काकींबद्दल आमचा आक्षेप नाही. मात्र, सोमेश्वरच्या संचालकांबद्दल आमचा आक्षेप आहे. अनेक वर्षांपासून एकाच कुटुंबात सत्ता आहे. त्यामुळे यंदा बदल गरजेचा आहे. संविधानिक मार्गाने हा बदल घडवून आणू,” असे स्पष्ट करत युगेंद्र पवार यांनी निवडणूक लढविण्याचे संकेत दिले.

सोमेश्वरमध्ये तिरंगी लढतीची शक्यता

सोमेश्वर कारखाना निवडणुकीत सध्या विविध राजकीय गटांकडून मोर्चेबांधणी सुरू आहे. एका बाजूला उपमुख्यमंत्री सुनेत्रा पवार यांच्या नेतृत्वाखालील पॅनेल, दुसऱ्या बाजूला युगेंद्र पवार यांनी जाहीर केलेले शेतकरी पॅनेल, तर तिसऱ्या बाजूला विजय शिवतारे यांच्या नेतृत्वाखालील शिवसेनेचे पॅनेल अशी संभाव्य तिरंगी लढत रंगण्याची चिन्हे आहेत. पॅनेलची अधिकृत घोषणा आणि उमेदवारांची अंतिम यादी जाहीर झाल्यानंतर निवडणुकीचे चित्र स्पष्ट होणार आहे. त्यामुळे युगेंद्र पवार यांच्या उपस्थितीत सुरू झालेल्या इच्छुकांच्या मुलाखतींकडे सोमेश्वर कारखाना कार्यक्षेत्रातील सभासदांसह राजकीय वर्तुळाचे लक्ष लागले आहे.