पाबळ : पाबळ व परिसरात नियोजित ४ हजार हेक्टरपैकी पहिल्या टप्प्यातील ७४३ हेक्टर जमिनीवर ‘महाराष्ट्र औद्योगिक विकास महामंडळा’कडून (एमआयडीसी) औद्योगिक वसाहत उभारण्याचे काम युद्धपातळीवर सुरू असताना, पुढील प्रक्रियेस नुकतीच स्थगिती देण्यात आली. या निर्णयामुळे अस्वस्थ झालेल्या परिसरातील तरुणाई आणि शेतकऱ्यांनी आक्रमक भूमिका घेतली असून, एमआयडीसीच्या समर्थनार्थ शिरूर तालुक्यातील धामारी येथे पत्रकार परिषद घेतली.

या वेळी ‘‘एमआयडीसी हवीच’’ असा एकमुखी नारा देत एमआयडीसी समर्थक शेतकरी व तरुण वर्गाने (जनरेशन वाय) लवकरच मुख्यमंत्री देवेंद्र फडणवीस आणि उद्योगमंत्री उदय सामंत यांची भेट घेऊन वस्तुस्थिती मांडणार असल्याचे स्पष्ट केले.

अचानक घेतलेल्या निर्णयामुळे अस्वस्थता 

यापूर्वी या भागातील प्रलंबित पाणीप्रश्न, रद्द झालेले विमानतळ आणि बदललेला रेल्वे सर्व्हे या पार्श्वभूमीवर प्रस्तावित एमआयडीसी जाहीर झाली होती. मात्र, काही विरोधकांनी व २ लोकप्रतिनिधींनी थेट मुख्यमंत्र्यांची भेट घेऊन स्थगिती मिळवल्याने स्थानिक शेतकरी व तरूण वर्गात संतापाची लाट पसरली आहे. जिरायत जमीनधारक शेतकऱ्यांचे मत जाणून न घेता वरिष्ठ पातळीवर घाईघाईने निर्णय घेण्यात आल्याचा आरोप यावेळी करण्यात आला.

आंदोलनाचा इशारा

शासनाकडून जमीन अधिग्रहणाच्या वेळी शेतकऱ्यांना योग्य मोबदला दिला जातो, तरीही या प्रकल्पाला अफवा पसरवून विरोध केला जात असल्याचे काहींनी सांगितले. एमआयडीसीच्या समर्थनासाठी सोशल मीडियावर हजारो तरुण एकत्र आले असून, वेळ पडल्यास एमआयडीसीच्या मागणीसाठी तीव्र आंदोलन उभारण्याचा इशाराही या वेळी देण्यात आला.

 

या भागातील हजारो तरुणांना चाकण, भोसरी आणि रांजणगाव एमआयडीसीत रोजगारासाठी भटकावे लागते. शेतीत जानेवारीपासूनच पाण्याचा गंभीर प्रश्न निर्माण होतो आणि कर्जाचा डोंगर वाढत जातो. त्यामुळे मुलांना स्थानिक पातळीवर रोजगार उपलब्ध व्हावा आणि जमिनीला योग्य भाव मिळावा, यासाठी एमआयडीसी अत्यंत आवश्यक आहे.

-भास्कर पुंडे, शेतकरी.