Yogi Adityanath : आपल्या अभिनयाने अनेक दशकांपासून प्रेक्षकांच्या मनावर अधिराज्य गाजवणारे अभिनेते नाना पाटेकर पुन्हा एकदा चर्चेच्या केंद्रस्थानी आले आहेत. मात्र यावेळी त्यांच्या एखाद्या चित्रपटातील भूमिकेची किंवा संवादाची चर्चा नाही, तर उत्तर प्रदेशचे मुख्यमंत्री योगी आदित्यनाथ यांनी नाना पाटेकर यांच्या सामाजिक कार्याचं केलेलं भरभरून कौतुक चर्चेचा विषय ठरलं आहे.

स्वभावातील स्पष्टवक्तेपणा, पडद्यावरील दमदार अभिनय आणि सामाजिक प्रश्नांवर व्यक्त होणारी संवेदनशीलता यामुळे नाना पाटेकर यांची वेगळी ओळख आहे. आता योगी आदित्यनाथ यांनीही त्यांच्या याच सामाजिक बांधिलकीचा आवर्जून उल्लेख केला आहे.

उत्तर प्रदेश पोलिसांच्या ‘खाकी का सितारा’ या गीताच्या लोकार्पणाच्या कार्यक्रमात योगी आदित्यनाथ यांनी नाना पाटेकर यांच्या कार्याचा उल्लेख केला. विशेष म्हणजे, नाना पाटेकर यांनी शेतकरी आत्महत्यांच्या प्रश्नावर केलेल्या मदतीचं कौतुक करताना योगींनी त्यांच्या कामातील ‘निस्वार्थपणा आणि प्रसिद्धीपासून दूर राहण्याची वृत्ती’ अधोरेखित केली.

‘नाना पाटेकर फक्त कलाकार नाहीत, तर संवेदनशील व्यक्ती…’

नाना पाटेकर यांच्याबद्दल बोलताना योगी आदित्यनाथ म्हणाले की, नाना पाटेकर हे केवळ मोठे कलाकार नाहीत, तर अतिशय संवेदनशील व्यक्ती आहेत. महाराष्ट्रात शेतकरी आत्महत्यांचा प्रश्न गंभीर असताना मदतीचा हात पुढे करणाऱ्या व्यक्तींमध्ये नाना पाटेकर आघाडीवर होते, असं त्यांनी सांगितलं.

नाना पाटेकर यांनी शेतकरी कुटुंबांना मदत करण्यासाठी केलेल्या कामाचा संदर्भ देताना योगींनी त्यांच्या कार्यपद्धतीचंही कौतुक केलं. प्रसिद्धी मिळवण्यासाठी किंवा स्वतःचा प्रचार करण्यासाठी नव्हे, तर गरजू लोकांच्या मदतीसाठी काम करणं, ही नाना पाटेकर यांच्या व्यक्तिमत्त्वाची विशेष बाजू असल्याचं त्यांनी नमूद केलं.

नाना पाटेकर यांच्याशी झालेल्या भेटीचा उल्लेख करताना योगी आदित्यनाथ यांनी आपल्याला त्यांचं काम पाहून आश्चर्य वाटल्याचं सांगितलं. एकीकडे रुपेरी पडद्यावर मोठं नाव आणि दुसरीकडे शेतकऱ्यांच्या अडचणी समजून घेऊन प्रत्यक्ष मदतीसाठी पुढे येणारा अभिनेता नाना पाटेकर यांच्या या दोन्ही बाजूंमधील फरकाकडे योगींनी लक्ष वेधलं. नाना पाटेकर यांनी केलेलं सामाजिक काम गाजावाजा न करता केलं, हा मुद्दाही त्यांनी अधोरेखित केला.

नाना पाटेकर आणि मकरंद अनासपुरे यांनी ‘नाम फाउंडेशन’च्या माध्यमातून महाराष्ट्रातील दुष्काळग्रस्त आणि शेतकरी कुटुंबांसाठी मोठ्या प्रमाणावर काम केलं आहे. शेतकरी आत्महत्यांनंतर त्यांच्या कुटुंबांना मदत, पाणी संवर्धन आणि ग्रामीण भागातील विविध उपक्रमांमध्ये या संस्थेने काम केलं आहे.

‘खाकी का सितारा’चंही योगींनी केलं कौतुक

या कार्यक्रमात योगी आदित्यनाथ यांनी उत्तर प्रदेश पोलिसांच्या ‘खाकी का सितारा’ या गाण्याचंही कौतुक केलं. या गीताला ज्येष्ठ गायक शंकर महादेवन यांनी आवाज दिला आहे. स्वातंत्र्यदिनाच्या पार्श्वभूमीवर उत्तर प्रदेश पोलिसांसाठी हे गीत सादर करण्यात आलं असून, पोलिसांच्या शौर्य, कर्तव्य आणि सेवाभावाला सलाम करण्याचा त्यामागील उद्देश आहे. त्यामुळे एकाच व्यासपीठावर नाना पाटेकर आणि शंकर महादेवन यांसारख्या दिग्गज कलाकारांचा उल्लेख झाल्याने हा कार्यक्रमही चर्चेत आला आहे.