Taarak Mehta Ka Ooltah Chashmah : गोकुलधाम सोसायटी म्हटलं की जेठालालचा गोंधळ, भिडेंचा तापटपणा, बापूजींचा सल्ला आणि सगळ्या सदस्यांची धमाल डोळ्यासमोर येते. पण यावेळी ‘तारक मेहता का उल्टा चश्मा’मध्ये नेहमीच्या हास्य-विनोदाला थोडा गंभीर टर्न मिळाला आहे.

माधवी भिडेंच्या घरगुती लोणचे-पापड व्यवसायावर थेट FDAची नजर पडली असून, एका लोणच्याच्या बरणीत काचेचा तुकडा आढळल्याच्या आरोपामुळे भिडे कुटुंबाच्या पायाखालची जमीनच सरकली आहे.

मालिकेचा नवा प्रोमो समोर आल्यानंतर सोशल मीडियावर याची जोरदार चर्चा सुरू झाली आहे. कारण माधवी भिडे वर्षानुवर्षे मेहनतीने चालवत असलेल्या घरगुती व्यवसायावर अचानक संकट कोसळतं.

FDAचे अधिकारी थेट भिडेंच्या घरी पोहोचतात आणि खाद्यपदार्थाच्या गुणवत्तेबाबत गंभीर आक्षेप नोंदवतात. ‘लोणच्यात काचेचा तुकडा’ या एका आरोपामुळे परवाना रद्द करण्याची कारवाई सुरू होते आणि माधवी-आत्माराम भिडेंना मोठा धक्का बसतो.

 

View this post on Instagram

 

A post shared by Sony SAB (@sonysab)

विशेष म्हणजे, पडद्यावर दाखवण्यात आलेल्या या काल्पनिक कथानकाची तुलना सध्या महाराष्ट्रात सुरू असलेल्या अन्नसुरक्षा कारवायांशी प्रेक्षक करत आहेत. महाराष्ट्र FDAचे आयुक्त तुकाराम मुंढे यांच्या धडक कारवायांच्या पार्श्वभूमीवर मालिकेत FDAचा ट्रॅक दाखवण्यात आल्याने नेटकऱ्यांनी याला थेट ‘तुकाराम मुंढे इफेक्ट’ असं म्हणायला सुरुवात केली आहे.

‘तारक मेहता’च्या नव्या प्रोमोमध्ये FDAचे दोन अधिकारी अचानक आत्माराम तुकाराम भिडे यांच्या घरी येतात. माधवी भिडे बनवत असलेल्या लिंबाच्या आणि मिरचीच्या लोणच्यात काचेचा तुकडा सापडल्याचं ते सांगतात. त्यानंतर खाद्यसुरक्षेच्या नियमांचा हवाला देत व्यवसायाच्या परवान्यावर कारवाई केली जाते.

माधवीसाठी हा धक्का केवळ व्यवसायापुरता मर्यादित नसतो. आपण इतकी वर्षे प्रामाणिकपणे आणि काळजीपूर्वक व्यवसाय केला, मग आपल्या लोणच्यात काचेचा तुकडा कसा आला? हा प्रश्न तिला सतावतो. दुसरीकडे आत्माराम भिडेही परिस्थितीमुळे चिंतेत पडतात.

मालिकेत माधवीचा पापड-लोणच्याचा व्यवसाय हा भिडे कुटुंबाच्या उत्पन्नाचा महत्त्वाचा भाग म्हणून दाखवण्यात आला आहे, तर आत्माराम भिडे शिकवणी वर्गही घेतात. त्यामुळे व्यवसायाचा परवाना रद्द होण्याची शक्यता निर्माण झाल्याने कुटुंबासमोर आर्थिक संकटही उभं राहतं.

Tukaram Mundhe

माधवी आणि आत्माराम भिडे संकटात सापडताच गोकुळधाम सोसायटीतील सदस्य त्यांच्या मदतीसाठी पुढे येताना दिसणार आहेत. जेठालाल, बापूजी आणि इतर सदस्य या प्रकरणाचा छडा लावण्याचा प्रयत्न करतील.

आता खरोखरच माधवीच्या लोणच्यात काचेचा तुकडा होता का? की या संपूर्ण प्रकरणामागे काही वेगळंच कारण आहे? FDAची कारवाई योग्य आहे की भिडे कुटुंबावर अन्याय होतोय? या प्रश्नांची उत्तरं आगामी भागांमध्ये मिळणार आहेत.

‘तुकाराम मुंढे इफेक्ट’ची सोशल मीडियावर चर्चा !

या ट्रॅकची सर्वाधिक चर्चा होत आहे ती महाराष्ट्रातील सध्याच्या FDA कारवायांशी त्याची साधर्म्यामुळे. तुकाराम मुंढे यांनी FDA आयुक्तपदाची जबाबदारी स्वीकारल्यानंतर अन्नसुरक्षा आणि स्वच्छतेच्या नियमांच्या अंमलबजावणीवर विशेष भर दिला आहे. त्यांच्या कारवायांमुळे रेस्टॉरंट्स, खाद्यविक्रेते आणि इतर खाद्यव्यवसायांमध्ये नियमांचे पालन करण्याबाबत चर्चा सुरू झाली आहे.

याच पार्श्वभूमीवर ‘तारक मेहता’ने अन्नसुरक्षा हा गंभीर विषय विनोदी मालिकेच्या कथानकातून प्रेक्षकांसमोर आणला आहे. त्यामुळे हा केवळ मनोरंजनाचा ट्रॅक न राहता ग्राहकांनी अन्नाची गुणवत्ता, स्वच्छता आणि सुरक्षिततेबाबत जागरूक राहण्याचा संदेश देणारा ठरत असल्याचेही दिसत आहे.