पुणे : कुख्यात गुंड निलेश घायवळ याचा भाऊ सचिन घायवळ याला गृहराज्यमंत्री योगेश कदम यांनी शस्त्र परवाना मंजूर केल्याचा आरोप करत विरोधकांनी राजीनाम्याची मागणी केली होती. यावर आता मुख्यमंत्री देवेंद्र फडणवीस यांनी स्पष्ट भूमिका मांडत कदम यांना ‘क्लीन चीट’ दिली आहे. त्यानंतर योगेश कदम यांनी देखील भली मोठी पोस्ट करत विरोधकांना जोरदार प्रत्युत्तर दिल आहे.

नेमकं काय म्हणाले योगेश कदम?

2019 पासून माझी राजकीय कारकीर्द संपुष्टात आणण्याचा प्रयत्न काहीजण करत आले. तरीसुद्धा सच्च्या शिवसैनिकांच्या जोरावर मी निवडून आलो. सत्तेतला आमदार म्हणून जनतेच्या अपेक्षा माझ्याकडून वाढल्या. परंतु तेव्हादेखील ज्या विरोधकाला आम्ही पराभूत केलं, त्यालाच ताकद देण्याचं काम काही जणांनी केलं. स्वतःच्या पक्षातील आमदाराला संपवण्याचा प्रयत्न काहीजण तेव्हापासूनच करत होते असे कदम म्हणाले.

माझ्या खासगी आयुष्यातदेखील ढवळाढवळ

माझ्या विरोधात जातीच्या आधारावर गलिच्छ राजकारण करण्याचे अनेक प्रकार झाले. पुन्हा 2024 च्या निवडणुकीत माझ्या कुटुंबियांचा स्वतःच्या वैयक्तिक राजकीय फायद्यासाठी वापर करून घेण्याइतपत राजकारणाची पातळी घसरली गेली. मला पराभूत करण्यासाठी त्यांनी समाज, पैसा आणि जातीच्या आधारावर गलिच्छ राजकारण करण्याचे अनेक प्रकार केले.

माझी वैयक्तिक बदनामी करण्याच्या हेतूने माझ्या खासगी आयुष्यातदेखील ढवळाढवळ करण्याचा काही जणांनी प्रयत्न केल्याचे योगेश कदम म्हणाले. तरीदेखील, दुसऱ्यांदा जनतेने माझ्यावर विश्वास ठेवून मला निवडून दिले. माझ्या वरिष्ठ नेत्यांनी माझ्यावर विश्वास दाखवत मला मंत्रीपद दिले. साहजिकच, ज्यांना मला आमदार म्हणून पाहण्याचीही इच्छा नव्हती, त्यांना मी मंत्री झालो हे कसं बघवणार असे योगेश कदम म्हणाले.

माझी इमेज डॅमेज होण्यासाठी पुरेपूर प्रयत्न

गेल्या सहा वर्षांपासून लोकप्रतिनिधी म्हणून काम करत असताना आजवर माझ्यावर कोणीही गुंड किंवा भ्रष्ट प्रवृत्तीचे समर्थन केल्याचे आरोप देखील करू शकले नाहीत. तरीसुद्धा काही ठराविक मंडळी माझी इमेज डॅमेज होण्यासाठी पुरेपूर प्रयत्न करत आहेत.

काय म्हणाले मुख्यमंत्री?

नाशिक दौऱ्यावर असताना मुख्यमंत्री फडणवीस यांनी माध्यमांशी संवाद साधला. सचिन घायवळ याला शस्त्र परवाना देण्याच्या आरोपांवर ते म्हणाले, “या प्रकरणी गृहराज्यमंत्र्यांनी एक सुनावणी घेतली होती. मात्र, पुणे पोलीस आयुक्तांनी वस्तुस्थिती समोर आणल्यानंतर शस्त्र परवाना देण्यात आलेला नाही. जर परवाना दिला असता, तर आरोपांना जागा होती. पण तसे झाले नाही.”