YCM Hospital – महापालिकेच्या यशवंतराव चव्हाण स्मृती (वायसीएम) रुग्णालयातील दातांचा एक्स-रे काढणारी मशीन बंद असल्याचा प्रकार समोर आला आहे. त्यामुळे रुग्णांची गैरसोय होत आहे. याबद्दल अनेक रुग्णांनी आणि त्यांच्या नातेवाइकांनी वायसीएम रुग्णालयातील प्रशासनाकडे तक्रार केल्यानंतरही प्रशासनाने याची दखल घेतलेली नाही. महापालिकेच्या वायसीएम रुग्णालयात केवळ पिंपरी-चिंचवड शहरातून नव्हे तर अन्य जिल्ह्यातून देखील मोठ्या प्रमाणात गोरगरीब नागरिक उपचारासाठी येत असतात.

रुग्णालयात आल्यानंतर उपचाराच्या दृष्टीने सर्व सोयीसुविधा रुग्णांना मिळणे अपेक्षित असताना रुग्णालयातील दातांची एक्स-रे मशीन बंद असल्यामुळे रुग्णांना बाहेर जाऊन तपासणी करावी लागत आहे. महापालिकेच्या वायसीएम रुग्णालयात गेल्या काही दिवसांपासून दातांचा एक्स-रे काढणारी मशीन बंद असल्यामुळे नागरिकांची मोठ्या प्रमाणात गैरसोय झाली आहे. वर्षभरात आतापर्यंत पाच वेळा ही मशीन बंद पडली आहे. वारंवार त्याच्या दुरुस्तीसाठी लाखो रुपये खर्च केले जातात. गेल्या वर्षभरात या मशीनवर किती तरी रुपये दुरस्तीसाठी खर्च करण्यात आला आहे.

वायसीएम रुग्णालयात दंतोपचार विभाग आहे. परंतु येथे केवळ दात काढणे अथवा जबड्यावरील मोठ्या शस्त्रक्रिया केल्या जात आहेत. परंतु सर्वसामान्य नागरिकांचे दात किडल्यानंतर त्यांना रुट कॅनल करावे लागते; तसेच इतर उपचार घ्यावे लागतात ते येथे मिळत नसल्याने सर्वसामान्य नागरिकांना खासगी रुग्णालयात जाऊन पैसे मोजावे लागत आहेत. यामुळे वायसीएम रुग्णालयात दंत विभाग आहे, तर सर्व सुविधा देण्याची मागणी नागरिकांकडून होत आहे.

“रुग्णांच्या सेवेसाठी एक्स रे मशीन आहे. ते खराब झाले होते, मात्र, त्याची दुरुस्ती केली आहे. आता रुग्णांची तपासणी सुरू झाली आहे.”
– डॉ. नेहा हरणखेडकर, दंत विभाग, वायसीएम रुग्णालय