PCMC News – पिंपरी-चिंचवडकरांसाठी जीवनदायी ठरलेल्या यशवंतराव चव्हाण स्मृती रुग्णालयातील (वायसीएम) आरोग्य सेवा अधिक सक्षम करण्यासाठी महापालिका आयुक्त डॉ. विजय सूर्यवंशी यांनी अचानक पाहणी केली. १ मेच्या शासकीय सुट्टीतही त्यांनी रुग्णालयात उपस्थित राहून विविध विभागांचा सखोल आढावा घेतला. केवळ औपचारिक पाहणी न करता त्यांनी सुविधांचे जणू ‘ऑडिट’च केले. या पाहणीदरम्यान अतिरिक्त आरोग्य वैद्यकीय अधिकारी डॉ. अभयचंद्र दादेवार, सह. प्राध्यापक डॉ. किशोर सूर्यवंशी, डॉ. मोहन वाघमारे, सिनियर सिस्टर शबनम सय्यद यांच्यासह वैद्यकीय अधिकारी व कर्मचारी उपस्थित होते. आयुक्तांनी शुक्रवारी सकाळी रुग्णालयाला भेट दिली. अतिदक्षता विभाग (ICU), नवजात शिशु अतिदक्षता विभाग (NICU), मेडिसिन, शस्त्रक्रिया, बालरोग, अस्थिरोग, ईएनटी, दंतचिकित्सा, अल्ट्रासोनोग्राफी, क्ष-किरण, डायलिसिस आणि आपत्कालीन विभागाची पाहणी केली. वाढत्या उष्णतेच्या पार्श्वभूमीवर ‘उष्माघात कक्षा’चीही विशेष तपासणी करण्यात आली. आयुक्तांनी रुग्णांच्या खाटांपर्यंत जाऊन संवाद साधला. उपचार, औषधे आणि डॉक्टरांची उपलब्धता याबाबत माहिती घेतली. काही रुग्णांनी सेवांबाबत समाधान व्यक्त केले. तरीही सेवा अधिक तत्पर आणि नागरिकाभिमुख करण्याचे निर्देश त्यांनी दिले. अतिरिक्त आरोग्य वैद्यकीय अधिकारी डॉ. अभयचंद्र दादेवार यांनी सादरीकरण केले. डॉ. विजय सूर्यवंशी, आयुक्त, पिंपरी चिंचवड महापालिका रुग्णालयातील सुविधा, मनुष्यबळ आणि आगामी नियोजन याची माहिती दिली. वायसीएमची भूमिका अधिक बळकट करण्यासाठी विभागांमध्ये समन्वय आवश्यक असल्याचे आयुक्तांनी सांगितले. “आरोग्य सेवा ही नागरिकांचा मूलभूत हक्क आहे. सेवा अधिक दर्जेदार, सुलभ आणि तत्पर असावी,” असे आयुक्तांनी स्पष्ट केले. रुग्णांना कोणतीही गैरसोय होऊ नये, यासाठी यंत्रणा सक्षम करण्याचे आदेश त्यांनी दिले. आयुक्तांच्या या अचानक पाहणीमुळे आरोग्य यंत्रणा सतर्क झाली आहे. रुग्णालयातील सेवा सुधारण्यासाठी आता अधिक वेगाने काम होण्याची अपेक्षा व्यक्त होत आहे. नागरिकांना दर्जेदार आरोग्य सेवा देण्यासाठी प्रशासनाने ठोस पावले उचलण्याची गरज अधोरेखित झाली आहे. “रुग्णालयातील सुविधा आणि सेवा प्रत्यक्ष पाहिल्या. रुग्णांशी संवाद साधला. मिळणाऱ्या सेवेबाबत समाधान दिसले. तरीही अधिक सुधारणा आवश्यक आहे. नागरिकांना सर्वोत्तम सेवा देण्यासाठी महापालिका कटिबद्ध आहे.” – डॉ. विजय सूर्यवंशी, महापालिका आयुक्त
