Family Suicide Attempt – आर्थिक विवेंचनेतून विषारी औषधाचा धूर घेत एकाच कुटुंबातील तिघांनी आत्महत्‍येचा प्रयत्‍न केला. यामध्‍ये पतीचा मृत्‍यू झाला. तर पत्‍नी आणि मुलीची प्रकृती चिंताजनक आहे. त्‍या दोघींवर वायसीएम रुग्‍णालयातील अतिदक्षता विभागात उपचार सुरू आहे. विनोद पिल्ले (वय ५०), सिरजा पिल्ले (वय ४५) आणि पूर्णिमा पिल्ले (वय १९, सर्व रा. करिष्मा ग्लोरी सोसायटी, A/5, रूम नं 201 मोरवाडी, पिंपरी)

अशी विषारी औषधांचा धूर घेतलेल्‍यांची नावे आहेत. त्‍यापैकी विनोद पिल्‍ले याचा जागीच मृत्‍यू झाला. तर सिरजा आणि पूर्णिमा यांच्‍यावर उपचार सुरू आहेत. पोलिसांनी त्‍या तिघांचेही मोबाइल ताब्‍यात घेतले असून त्‍यांनी आनलाइन आत्‍महत्‍येबाबत माहिती घेतली असावी, अशी शक्‍यता संत तुकाराम नगर पोलीस ठाण्‍याचे वरिष्‍ठ सुहास आव्‍हाड यांनी व्‍यक्‍त केली.

अशी उघडकीस आली घटना
सिरजा या मोरवाडीतील एका नामांकित इंग्रजी माध्‍यमांच्‍या शाळेत समन्‍वयक म्‍हणून काम करतात. या कामावर आल्‍या नाहीत म्‍हणून त्‍यांच्‍या शाळेतील सहकारी यांनी त्‍यांना फोन लावला. मात्र त्‍यांनी फोन उचलला नाही. त्‍यामुळे त्‍यांच्‍या नातेवाइकांना फोन केला. नातेवाइकांनीही फोन केला असता उचलला नाही.

त्‍यामुळे जवळच राहणा-या नातेवाइक घरी गेले असता दरवाजा केवळ लोटून घेतला होता. दरवाजा उघडताच त्‍यांना तिघेजण बेशुद्ध अवस्‍थेत दिसून आले. ही बाब सोसायटीतील नागरिकांना कळताच त्‍यांनी पोलिसांना पाचारण केले. पोलिसांनी त्‍या तिघांनाही वायसीएम रुग्‍णालयात दाखल केले. मात्र उपचारापूर्वीच विनोद यांचा मृत्‍यू झाला.

सुसाइड नोटमध्‍ये काय लिहिले
आत्‍महत्‍या करण्‍यापूर्वी विनोद यांनी एक चिठ्‌ठी लिहून ठेवली. या चिठ्‌ठीत त्‍यांनी आपण सामुहिक आर्थिक विवेंचनेतून आत्‍महत्‍या करीत असल्‍याचे लिहिले होते. तसेच आपल्‍या आत्‍महत्‍येला कोणालाही जबाबदार धरू नये असेही म्‍हटले होते.

कोठून मिळविले विषारी औषध
विनोद यांनी १ जून रोजी सोडियम नायट्रेट हे विषारी औषध ऑनलाइन मागितले होते. हे औषध सुरक्षा व शासकीय नियमांमुळे किंवा घातक श्रेणीत येणा-या रसायनांची विक्री सर्वसामान्‍य ग्राहकांसाठी अशा प्‍लॅटफाॅर्मवर प्रतिबंधित किंवा मर्यादित असते.

अशी केली आत्‍महत्‍या,
पिल्‍ले कुटुंबीय मध्‍यरात्रीपर्यंत जागे होते. मध्‍यरात्री अडीच वाजता मुलीने सोशल मीडियावर हजेरी लावली होती. त्‍यानंतर कोळसा जाळून त्‍यावर विषारी औषधाचा धूर केला. त्‍यानंतर त्‍यांनी तो धूर घेतल्‍यानंतर बेशुद्ध पडले.

संपूर्ण कुटुंब होते उच्‍चशिक्षित
मयत विनोद यांचे शिक्षण आयआयएम अहमदाबाद येथून मास्‍टर इन कंप्‍युटर सायन्‍सचे झाले होते. मुलगी पूर्णिमाही चिंचवड येथील एएसएम महाविद्यालयातून कंप्‍युटर सायन्‍सचे दुस-या वर्षात शिक्षण घेत होती. आई सिरजा या मोरवाडीतील नामांकित शाळेत समन्‍वयक म्‍हणून काम पाहात होत्‍या.

कर्जबाजारीपणामुळे घरही विकले
विनोद हे नोव्‍हेंबर २०२४ पर्यंत डॉन बॉस्‍को या कंपनीत कामाला होते. तसेच पिल्‍ले कुटुंबीय हे नेहरूनगरमध्‍ये स्‍वतःच्‍या फ्लॅटमध्‍ये राहत होते. मात्र तीन वर्षापूर्वी त्‍यांनी आर्थिक विवेंचनेतून आपले राहते घर विकले. त्‍यानंतर ते मोरवाडीत भाड्याच्‍या खोलीत राहू लागले.