Yash Thakur T20I Debut India vs Zimbabwe 2nd T20I Harare : भारत आणि झिम्बाब्वे यांच्यातील तीन सामन्यांच्या टी-२० मालिकेतील दुसरा महत्त्वाचा मुकाबला आज, शनिवारी हरारे स्पोर्ट्स क्लब मैदानावर खेळला जात आहे. या सामन्यात झिम्बाब्वेचा कर्णधार सिकंदर रझाने नाणेफेक जिंकून प्रथम गोलंदाजी करण्याचा निर्णय घेतला आहे. भारतीय संघाने या सामन्यात आपल्या प्लेइंग इलेव्हनमध्ये एक मोठा बदल केला असून, वेगवान गोलंदाज यश ठाकूरला (Yash Thakur) आंतरराष्ट्रीय क्रिकेटमध्ये पदार्पणाची संधी दिली आहे. त्याला दुखापतग्रस्त अशोक शर्माच्या जागी संघात स्थान मिळाले आहे.

मालिकेवर ताबा मिळवण्यासाठी टीम इंडिया सज्ज!

कर्णधार श्रेयस अय्यरच्या नेतृत्वाखालील युवा भारतीय संघाने पहिल्या सामन्यात ७ गडी राखून दणदणीत विजय मिळवला होता. त्यामुळे आजचा सामना जिंकल्यास भारताला मालिकेत २-० अशी अजिंक्य आघाडी मिळेल. नाणेफेकीनंतर बोलताना श्रेयस अय्यर म्हणाला, “आम्हालाही प्रथम फलंदाजीच करायची होती. ही पट्टी मागच्या सामन्यासारखी कठीण वाटत नाहीये आणि खेळपट्टीवर चांगला बाऊन्स मिळण्याची अपेक्षा आहे.” दुसरीकडे, झिम्बाब्वेने आपल्या संघात कोणताही बदल केलेला नाही.

A dream realized ✨

Congratulations to Yash Thakur as he is all set to make his #TeamIndia debut 👏👏

Updates ▶️ https://t.co/Z8UUziVx8d #ZIMvIND pic.twitter.com/IXBuP7rOfU

— BCCI (@BCCI) July 25, 2026

पहिल्या सामन्यातील हिरोवरच पुन्हा मदार!

भारताने पहिल्या सामन्यात गोलंदाजी आणि फलंदाजी या दोन्ही विभागात अप्रतिम कामगिरी केली होती. १५ वर्षीय सलामीवीर वैभव सूर्यवंशीने अवघ्या १८ चेंडूंत अर्धशतक झळकावून इतिहास रचला होता, तर इशान किशनने ३५ आणि कर्णधार अय्यरने नाबाद २८ धावा करत सामना १३.२ षटकांत संपवला होता. गोलंदाजीत मयंक यादवने पहिल्याच चेंडूवर विकेट घेत १८ धावांत २ विकेट्स घेतल्या होत्या, ज्यासाठी त्याला ‘प्लेयर ऑफ द मॅच’ घोषित केले होते. आजच्या सामन्यात पदार्पण करणाऱ्या यश ठाकूरकडूनही अशाच भेदक गोलंदाजीची अपेक्षा असेल.

हेही वाचा – Zandu Kumar Medal : ई-रिक्षाचालक ते राष्ट्रकुलचा चॅम्पियन! पोलिओवर मात करत झंडु कुमारने ग्लास्गोत उघडलं भारताच्या पदकांच खातं

दोन्ही संघांची प्लेइंग इलेव्हन (Playing XI):

भारत: वैभव सूर्यवंशी, अभिषेक शर्मा, इशान किशन (यष्टीरक्षक), श्रेयस अय्यर (कर्णधार), तिलक वर्मा, रिंकू सिंग, शिवम दुबे, रवी बिश्नोई, प्रिन्स यादव, यश ठाकूर, मयंक यादव.

झिम्बाब्वे: ब्रायन बेनेट, बेन कुरेन, डिओन मायर्स, सिकंदर रझा (कर्णधार), रायन बर्ल, वेस्ली मधेवेरे, तदिवानाशे मारुमनी (यष्टीरक्षक), ब्रॅड इव्हान्स, न्यूमन न्यामुरी, रिचर्ड नगारवा, ब्लेसिंग मुझाराबानी.