Yash Dayal responds to serious allegations : आरसीबीचा वेगवान गोलंदाज यश दयालला त्याच्या कथित गर्लफ्रेंडने लावलेल्या गंभीर आरोपांमुळे अडचणींचा सामना करावा लागत आहे. मात्र, आता त्याने या सर्व प्रकरणावर मौन सोडले आहे. त्याचबरोबर त्या युवतीच्या तिच्या कुटुंबाविरुद्ध तक्रार दाखल केली आहे. गाझियाबाद येथील एका युवतीने त्याच्यावर लग्नाचे आमिष दाखवून ‘आर्थिक, मानसिक आणि लैंगिक शोषण’ केल्याचा आरोप करत एफआयआर दाखल केली आहे.

विशेष म्हणजे, यश दयालने गेल्या आयपीएल हंगामात चॅम्पियन झालेल्या आरसीबीसाठी अप्रतिम कामगिरी केली होती. आरसीबीला चॅम्पियन बनवण्यात यश दयालची महत्त्वाची भूमिका होती. आता या स्टार खेळाडूने प्रथमच आपल्या बचावात स्पष्टीकरण दिले आहे. यश दयालने त्या युवतीविरुद्ध एफआयआर दाखल करण्याची मागणी करत प्रयागराज पोलिसांत तक्रार नोंदवली आहे. २७ वर्षीय या वेगवान गोलंदाजाने खुल्दाबाद पोलिस स्टेशनला त्या युवतीविरुद्ध गुन्हा दाखल करण्याची विनंती केली आहे.

यश दयालनेही दाखल केली तक्रार –

माध्यमांच्या वृत्तानुसार, यशने त्या युवतीवर एक आयफोन आणि एक लॅपटॉप चोरी केल्याचा आरोप केला आहे. या डावखुऱ्या वेगवान गोलंदाजाने प्रयागराज पोलिसांना सांगितले की, २०२१ मध्ये इन्स्टाग्रामद्वारे त्याची त्या युवतीशी ओळख झाली होती. त्यानंतर त्यांनी एकमेकांशी संवाद सुरू केला. यश दयालने असा आरोप केला आहे की, त्या युवतीने स्वतःच्या आणि तिच्या कुटुंबाच्या उपचारांच्या बहाण्याने त्याच्याकडून लाखो रुपये उसने घेतले आणि ते परत करण्याचे वचन दिले, परंतु अद्याप तसे झालेले नाही. त्याने असा दावाही केला आहे की, त्या युवतीने वारंवार शॉपिंगसाठी त्याच्याकडून पैसे उसने घेतले. या क्रिकेटपटूचे म्हणणे आहे की, त्याच्याकडे या दाव्यांना पुष्टी देणारे पुरावे आहेत.

हेही वाचा – Avinash Jamwal : अविनाश जम्वालचा जागतिक बॉक्सिंग कपमध्ये दमदार पंच: रौप्यपदकासह भारताचे उंचावलं नाव

दयालने युवतीच्या कुटुंबाच्याविरुद्धही दाखल केली तक्रार

यश दयालने असेही सांगितले की, जेव्हा त्याला कळले की त्या युवतीने त्याच्याविरुद्ध गाझियाबाद पोलिसांत तक्रार दाखल केली आहे, तेव्हा त्याने त्या युवतीविरुद्ध कायदेशीर कारवाई करण्याचा निर्णय घेतला. त्याने तीन पानांच्या तक्रारीत एका युवतीसह तिच्या कुटुंबातील दोन सदस्य आणि इतर काही व्यक्तींविरुद्ध एफआयआरदाखल करण्याची मागणी केली आहे. एका वरिष्ठ पोलीस अधिकाऱ्याने सांगितले की, रविवारी इंदिरापुरम पोलीस ठाण्यात यश दयाल (वय २७) याच्याविरुद्ध एका युवतीने बीएनएस कलम ६९ (फसवणुकीने शारीरिक संबंध प्रस्थापित करणे, ज्यात लग्नाचे खोटे आश्वासन देणे समाविष्ट आहे) अंतर्गत एफआयआर दाखल केली होती.

हेही वाचा – SA Vs ZIM : दक्षिण आफ्रिकेचा मोठा विजय ! ऑस्ट्रेलिया, वेस्ट इंडिजनंतर ‘ही’ कामगिरी करणारा ठरला तिसरा संघ

ही कारवाई तेव्हा झाली, जेव्हा एका युवतीने २१ जून रोजी उत्तर प्रदेशचे मुख्यमंत्री योगी आदित्यनाथ यांच्याकडे आयजीआरएसद्वारे तक्रार केली होती. तक्रारीत तिने आरोप केला होता की, ती गेल्या पाच वर्षांपासून ज्या क्रिकेटरसोबत रिलेशनमध्ये होती, त्याने तिचे शारीरिक शोषण केले.