पिंपरी  : हिंजवडी ते शिवाजीनगर मेट्रो मार्गाचे काम येत्या दहा दिवसांत पूर्ण होईल, असा दावा पीएमआरडीएचे महानगर आयुक्त डॉ. अभिजीत चौधरी यांनी मंगळवारी (दि. २९) केला. मात्र, काम पूर्ण झाल्यानंतरही मेट्रो सेवा नेमकी कधी सुरू होणार, याबाबत निश्चित तारीख देण्याऐवजी सेवा सुरू करण्याचा निर्णय राज्य शासन घेणार असल्याचे सांगत पीएमआरडीएने पुन्हा एकदा उद्घाटनाची जबाबदारी शासनाच्या कोर्टात टाकली. त्यामुळे गेल्या अनेक महिन्यांपासून मेट्रो सुरू होण्याची वाट पाहणाऱ्या हिंजवडीतील आयटीयन्सच्या पदरी पुन्हा एकदा प्रतीक्षाच पडण्याची शक्यता आहे.

हिंजवडी-शिवाजीनगर मेट्रो मार्गाची लांबी २३.२०३ किलोमीटर असून, या मार्गावर २३ स्थानके आहेत. प्रकल्पाचे काम मार्च २०२६ पर्यंत पूर्ण करण्याचे नियोजन यापूर्वी करण्यात आले होते. मात्र, प्रत्यक्षात सेवा सुरू होण्यास विलंब होत गेला. मार्च २०२६ अखेर प्रकल्पाचे भौतिक काम ९४.५८ टक्के पूर्ण झाले होते. त्यानंतर जुलैमध्ये मेट्रो सुरू होईल, अशी घोषणा करण्यात आली.

मात्र, सुरक्षा मंजुरीच्या कारणामुळे जुलैचा मुहूर्त हुकला. त्यानंतर सप्टेंबरअखेर सेवा सुरू करण्याचे नियोजन पुढे आले. सप्टेंबरच्या मध्यात १७ स्थानकांवर सेवा सुरू करण्याची तयारी असल्याचाही दावा करण्यात आला होता. आता पुन्हा दहा दिवसांत काम पूर्ण होण्याचा दावा करण्यात आला आहे.

येत्या दहा दिवसांत १७ स्टेशनचे काम पूर्ण होणार आहे. ते काम पूर्ण झाल्यानंतर मेट्रो सुरू होईल. मात्र, उद्घाटन करून प्रत्यक्ष मेट्रो कधी सुरू करायची याबाबत राज्य शासन निर्णय घेईल. तो निर्णय पीएमआरडीए प्रशासन घेऊ शकत नसल्याने महानगर आयुक्त डॉ. अभिजीत चौधरी यांनी सांगितले.

मेट्रो सेवा सुरू करण्याची तारीख प्रशासनाकडून निश्चितपणे सांगितली जात नसल्याने मेट्रो सुरू होण्याचा प्रश्न कायम आहे. काम पूर्ण झाल्यानंतर आवश्यक सुरक्षा प्रक्रिया, शासन निर्णय आणि नेत्यांच्या वेळेत उद्घाटन घेण्यासाठी होणारा खटाटोप यामुळे आणखी विलंब होणार का? असा सवाल उपस्थित होत आहे.

आयटीयन्समध्ये तीव्र संताप
हिंजवडी परिसरात मोठ्या प्रमाणावर आयटी कंपन्या असल्याने दररोज हजारो कर्मचारी पुणे, पिंपरी-चिंचवड आणि परिसरातून हिंजवडीकडे ये-जा करतात. सध्याच्या वाहतूक कोंडीमुळे या प्रवासासाठी मोठा वेळ खर्ची पडतो. मेट्रो सुरू झाल्यानंतर हा प्रवास मोठ्या प्रमाणात सुलभ होण्याची अपेक्षा आहे.

पीएमआरडीएने देखील मेट्रोमुळे वाहतूक कोंडी, प्रवासाचा वेळ आणि इंधन खर्च कमी होईल असा दावा केला आहे.
मात्र, कधी जुलै, ऑगस्ट तर कधी सप्टेंबर आणि आता पुन्हा नव्या मुदतीची चर्चा सुरू असल्याने आयटीयन्समध्ये नाराजी वाढत आहे. मेट्रोचे काम पूर्ण होण्याच्या घोषणा वारंवार होत असताना प्रत्यक्ष सेवा सुरू होण्यासाठी मात्र निश्चित तारीख मिळत नसल्याने प्रशासनाच्या दाव्यांवरच प्रश्नचिन्ह निर्माण झाले आहे.

पंतप्रधानांच्या वेळेची प्रतीक्षा?
कामाच्या सद्यस्थितीबाबत पीएमआरडीए प्रशासनाने पंतप्रधान कार्यालयाला कळवले आहे. त्याबाबत कार्यालयाकडूनच विचारणा झाली होती. पंतप्रधानांच्या हस्ते मेट्रोचे उद्घाटन करण्यासाठी राज्य शासन इच्छुक आहे. मात्र, पंतप्रधान कार्यालयाकडून वेळ मिळत नसल्याने मेट्रोचे उद्घाटन लांबवले जात असल्याची चर्चा आहे.

‘येत्या दहा दिवसांत १७ स्टेशनचे काम पूर्ण होईल. त्या मार्गावर मेट्रो कधी सुरू करायची याबाबत राज्य शासन निर्णय घेईल. आमच्याकडून संपूर्ण तयारी झालेली असून कधीही मेट्रो सुरू करता येईल.’- डॉ. अभिजीत चौधरी. महानगर आयुक्त.

मुहूर्तांची मालिका

• पहिला मूहर्त मार्च २०२६ मध्ये
• जुलै २०२६ मध्ये पहिल्या टप्यातील सेवा सुरू करण्याचे लक्ष्य
• ऑगस्ट २०२६ मध्ये सुरू होणार असल्याचा दावा
• सप्टेंबर अखेर १७ स्थानकांवर मेट्रो धावणार असल्याचा दावा
• आता १० दिवसांत काम पूर्ण होणार असल्याचा नवीन दावा

Pune Graduate constituency Election 2026: पुणे पदवीधरच्या जागेवरून महायुतीत मिठाचा खडा?