Women Safety – शहरातील महिलांसाठी असलेल्या सार्वजनिक स्वच्छतागृहांच्या सुरक्षेचा प्रश्न ऐरणीवर आला आहे. महापालिकेच्या अखत्यारीतील महिलांच्या स्वच्छतागृहांमध्ये एकाही ठिकाणी महिला सुरक्षारक्षक नेमण्यात आलेला नसल्याची धक्कादायक माहिती प्रशासनाने नगरसेविकेने विचारलेल्या लेखी प्रश्नाच्या उत्तरातून दिली आहे. त्यातच आवश्यक त्या ठिकाणी सुरक्षेसाठी सीसीटीव्ही यंत्रणाही उपलब्ध नसल्याने महिलांच्या सुरक्षिततेबाबत महापालिका प्रशासनाची उदासीनता समोर आली आहे.

नगरसेविका ऐश्वर्या थोरात यांनी महिला शौचालये आणि स्वच्छतागृहांची संख्या, स्थिती आणि सुरक्षाव्यवस्थेबाबत प्रशासनाला लेखी प्रश्न विचारला होता. त्यावर महापालिकेने पाचही परिमंडळांतील माहिती दिली. शहरात एकूण १३०९ शौचालये आणि स्वच्छतागृहे असून, त्यापैकी ६४ बंद, तर २८ मोडकळीस आलेली आहेत. विशेष म्हणजे, सुरू असलेल्या शौचालयांमध्येही महिलांच्या सुरक्षेसाठी स्वतंत्र सुरक्षारक्षक उपलब्ध नसल्याचे स्पष्ट झाले आहे.

गणेशोत्सवाच्या पार्श्वभूमीवर या समस्येचे गांभीर्य आणखी वाढले आहे. गणेशोत्सव काळात पुण्यातील गणेश मंडळांचे देखावे आणि आरास पाहण्यासाठी शहरासह बाहेरगावांहून लाखो नागरिक येतात. त्यामुळे सार्वजनिक शौचालयांवर मोठा ताण येतो. मात्र दरवर्षीप्रमाणे यंदाही शौचालयांची संख्या, स्वच्छता आणि दुरवस्थेचा मुद्दा चर्चेत आला असून, सुरक्षेचा प्रश्नही त्यात नव्याने पुढे आला आहे.

हडपसर-मांजरीची स्थिती गंभीर
क्षेत्रीय कार्यालयनिहाय पाहता हडपसर-मांजरी भागातील स्वच्छतागृहांची स्थिती सर्वाधिक चिंताजनक आहे. या भागातील ७५ स्वच्छतागृहे-शौचालयांपैकी १४ बंद असून, तब्बल २१ मोडकळीस आलेली आहेत. सिंहगड भागातील ६० पैकी २५ स्वच्छतागृह-शौचालये बंद आहेत. ढोले पाटील क्षेत्रीय कार्यालयाच्या हद्दीत सर्वाधिक १३४ शौचालये असून,

त्यापैकी चार बंद आणि पाच मोडकळीस आलेली आहेत. गणेशोत्सव तोंडावर असताना महापालिकेने बंद व मोडकळी आलेली शौचालये तातडीने सुरू करण्यासोबतच महिलांच्या सुरक्षिततेसाठी आवश्यक ठिकाणी सुरक्षारक्षक आणि सीसीटीव्ही यंत्रणा उपलब्ध करून देण्याची गरज आहे.