Amit Shah – केंद्रीय गृहमंत्री अमित शहा यांनी मंगळवारी सरकारच्या अंमली पदार्थविरोधी निर्णायक लढ्याचे रणशिंग फुंकले. देशाला वर्ष २०२९ अखेरपर्यंत अंमली पदार्थमुक्त बनवण्याचा निर्धार त्यांनी व्यक्त केला.

देशातील सर्व राज्ये आणि केंद्रशासित प्रदेशांच्या अंमली पदार्थविरोधी कृती दलांच्या प्रमुखांची तिसरी राष्ट्रीय परिषद दिल्लीत संपन्न झाली. परिषदेच्या उद्घाटनप्रसंगी शहा बोलत होते.

मागील पाच वर्षांत आपण अनेक आव्हानांवर यशस्वीपणे मात केली. त्या आव्हानांमध्ये प्रामुख्याने काश्‍मीरमधील दहशतवाद, ईशान्येतील बंडखोरी आणि नक्षलवादाचा समावेश आहे.

अंमली पदार्थविरोधी लढाई सर्वांत अवघड आहे. मात्र, ती लढाई आपण सोडू शकत नाही. वर्ष २०४७ पर्यंत विकसित भारत निर्माण करणे, भावी पिढ्यांना वाचवणे आणि युवकांना देशाच्या विकासाशी जोडण्याची उद्दिष्टे आपण समोर ठेवली आहेत. ती गाठण्यासाठी देशाला अंमली पदार्थमुक्त बनवणे हा एकमेव पर्याय आहे, अशी ठाम भूमिका त्यांनी मांडली.

पंतप्रधान नरेंद्र मोदी यांच्या नेतृत्वाखाली अंमली पदार्थमुक्त देशाचे लक्ष्य गाठण्यासाठी एकापाठोपाठ एक पाऊले उचलली जात आहेत. आता आपली वाटचाल बैठकीपासून ते मिशनपर्यंत होणे गरजेचे आहे.

केवळ अंमली पदार्थ जप्ती पुरते मर्यादित न राहता संपूर्ण जाळे उद्धवस्त करण्यावर भर द्यायला हवा. गुन्हा दाखल होऊन दोषी ठरवण्यापर्यंत मजल मारायला हवी. आता निर्णायक लढ्याची वेळ आली आहे.

आपण सामूहिक प्रयत्नांमधून देशातील अंमली पदार्थांच्या व्यापाराचे मुळापासून उच्चाटन करण्यात यशस्वी होऊ. अंमली पदार्थविरोधी लढ्याचा आराखडा तयार करण्यात आला आहे.

त्याची अंमलबजावणी जिल्हा स्तरावरून केली जाईल. शाळा-महाविद्यालयांमध्ये जागृती केली जाईल. संबंधित लढ्याला अगदी गाव पातळीवरून पाठिंबा मिळायला हवा, असेही शहांनी अधोरेखित केले.