Haryana Election : मोठी कोंडी फोडत कॉंग्रेस आणि आपने हरियाणा विधानसभा निवडणुकीसाठी हातमिळवणी निश्‍चित केल्याचे समजते. त्यावर अधिकृत शिक्कामोर्तब उद्या (सोमवार) होण्याची शक्यता आहे. हरियाणातील हातमिळवणीविषयी अनिश्‍चितता निर्माण झाल्याचे चित्र शनिवारपर्यंत होते.

मात्र, कॉंग्रेस आणि आपमध्ये अखेर समझोता दृष्टीपथात आल्याची माहिती रविवारी आपमधील सुत्रांनी दिली. कॉंग्रेस नेते दिपक बाबरिया आणि आपचे नेते राघव चढ्ढा यांच्यातील चर्चा सकारात्मक दिशेने जात आहे. दोन्ही पक्षांमधील आघाडीवर उद्या अंतिम शिक्कामोर्तब होऊ शकेल. आपने हरियाणात ५ जागा लढवण्याविषयी सहमती दर्शवली आहे, असे त्या सुत्रांनी नमूद केले.

हरियाणात विधानसभेच्या एकूण ९० जागा आहेत. त्यातील १० जागा आघाडी झाल्यास लढवण्याचा प्रस्ताव आपने मांडला होता. मात्र, कॉंग्रेसने आपसाठी ७ पेक्षा अधिक जागा सोडण्यास नकार दर्शवला. दोन्ही पक्ष आपापल्या जागांवर ठाम राहिल्याने त्यांच्यातील वाटाघाटींना ब्रेक लागल्याचे पुढे आले.

तशात आपने शनिवारी कॉंग्रेसला अप्रत्यक्षपणे इशारा दिला. आम्हाला कमी लेखणाऱ्यांना भविष्यात पश्‍चात्ताप होईल, असे आपने म्हटले. त्यामुळे दोन्ही पक्षांतील हातमिळवणीची शक्यता धूसर बनल्याचे मानले गेले.

अर्थात, कॉंग्रेस आणि आपमध्ये पडद्यामागे बोलणी चालूच राहिल्याचे आता सूचित झाले आहे. कॉंग्रेस आणि आप हे राष्ट्रीय स्तरावरील विरोधी पक्षांच्या इंडिया आघाडीचे घटक आहेत. मात्र, त्यांनी प्रारंभी हरियाणात स्वतंत्रपणे लढण्याची भूमिका स्वीकारली.

काही दिवसांपूर्वी त्यांच्यात हातमिळवणीसाठी वाटाघाटी सुरू झाल्याची माहिती अचानकपणे समोर आली. पण, जागावाटपावरून आघाडी करण्याच्या मार्गात मोठा अडथळा उभा ठाकल्याचेही पुढे आले. आता सामंजस्याचे धोरण स्वीकारत त्यांनी कोंडी फोडल्याचे स्पष्ट होत आहे.