WI vs ZIM West Indies beat Zimbabwe by 107 runs : श्रीलंकेसारख्या कठीण परिस्थितीत ऑस्ट्रेलियाला नमवणाऱ्या झिम्बाब्वे संघाची भारतात सुरू असलेल्या टी-२० विश्वचषकात मोठी फजिती झाली आहे. ‘सुपर-८’ फेरीतील आपल्या पहिल्याच सामन्यात दोन वेळच्या माजी विजेत्या वेस्ट इंडीजने झिम्बाब्वेचा १०७ धावांच्या प्रचंड फरकाने पराभव केला. धावांच्या बाबतीत या विश्वचषकातील हा आतापर्यंतचा सर्वात मोठा विजय ठरला आहे.

धावांचा डोंगर आणि हेटमायरचे वादळ –

झिम्बाब्वेचा कर्णधार सिकंदर रझाने नाणेफेक जिंकून प्रथम गोलंदाजी करण्याचा निर्णय घेतला, जो पूर्णपणे अंगलट आला. वेस्ट इंडीजने प्रथम फलंदाजी करताना ६ बाद २५४ धावांचा महाकाय डोंगर उभा केला, जो टी-२० विश्वचषकाच्या इतिहासातील दुसरा सर्वोच्च स्कोर आहे. कॅरेबियन संघाची सुरुवात काहीशी संथ झाली होती; ब्रँडन किंग (९ धावा) आणि कर्णधार शाई होप (१४ धावा) स्वस्तात बाद झाले होते. मात्र, त्यानंतर शिमरॉन हेटमायर आणि रोव्हमन पॉवेल यांनी डावाची सूत्रे हाती घेतली आणि तिसऱ्या विकेटसाठी १२२ धावांची तुफानी भागीदारी केली.

हेटमायरने अवघ्या १९ चेंडूत अर्धशतक ठोकत वादळी सुरुवात केली आणि ३४ चेंडूत ७ चौकार आणि ७ षटकारांच्या मदतीने ८५ धावांची धडाकेबाज खेळी केली. त्याला कर्णधार पॉवेलने ३५ चेंडूत ५९ धावांचे योगदान देऊन उत्तम साथ दिली. शेवटच्या षटकांमध्ये रदरफोर्डने १३ चेंडूत नाबाद ३१, तर रोमारिओ शेफर्डने १० चेंडूत २१ धावा कुटल्या. झिम्बाब्वेसाठी ब्लेसिंग मुजारबानीने सर्वाधिक २ बळी घेतले.

फिरकीच्या जाळ्यात झिम्बाब्वेचा संघ अडकला –

२५५ धावांच्या विशाल लक्ष्याचा पाठलाग करताना झिम्बाब्वेची सुरुवात अत्यंत खराब झाली. तदिवानाशे मारुमानीने वेगवान सुरुवात देण्याचा प्रयत्न केला, मात्र १.५ षटकात २० धावा असताना पुढच्या ५ चेंडूत एकही धाव न घेता ३ विकेट्स पडल्या आणि झिम्बाब्वेचे कंबरडे मोडले. डिओन मेयर्सने १५ चेंडूत २८ धावा करून प्रतिकार करण्याचा प्रयत्न केला, पण तो गुडकेश मोतीचा शिकार ठरला. सिकंदर रझा आणि टोनी मुंयोंगा यांनी ४२ धावांची भागीदारी करून डाव सावरण्याचा प्रयत्न केला, मात्र तो पुरेसा ठरला नाही.

एका वेळी ९४ वर ४ बाद असलेल्या झिम्बाब्वेची अवस्था १०३ वर ९ बाद अशी झाली होती. मात्र, शेवटच्या जोडीने वेस्ट इंडीजला काही काळ चांगलेच सतावले. ब्रॅड इव्हान्सने ५ षटकारांसह ४२ धावांची खेळी केली आणि रिचर्ड गवारासोबत शेवटच्या विकेटसाठी ४४ धावा जोडल्या, जी झिम्बाब्वेच्या डावातील सर्वात मोठी भागीदारी होती. वेस्ट इंडीजच्या फिरकीपटूंनी वर्चस्व गाजवले; डाव्या हाताचा फिरकीपटू गुडकेश मोती याने ४ तर अकील हुसेनने ३ बळी घेतले. झिम्बाब्वेचा संपूर्ण संघ १८ व्या षटकात १४७ धावांवर गारद झाला.