शिरूर :  शिरूर शहरात सक्षम ग्रामीण रुग्णालयाची आरोग्य यंत्रणा उपलब्ध असताना अत्याचारित महिला व इतर प्रकरणांतील पीडितांना वैद्यकीय तपासणीसाठी पुण्याच्या ससून रुग्णालयात पाठविण्याची वेळ का येते ? असा संतप्त सवाल नागरिकांकडून उपस्थित केला जात आहे. शिक्रापूर येथे स्थानिक पातळीवर वैद्यकीय तपासणीची सुविधा उपलब्ध होत असेल, तर शिरूरमध्ये ती का उपलब्ध करून दिली जात नाही असा सवाल आता नागरिकांनी प्रशासनाला केला आहे.

शिरूर पोलीस ठाण्याच्या हद्दीत विविध गुन्ह्यांमध्ये पीडित महिला अथवा व्यक्तींची वैद्यकीय तपासणी आवश्यक असते. मात्र, त्यांना शिरूरमधून थेट पुण्यातील ससून रुग्णालयात घेऊन जावे लागते. त्यामुळे पोलीस, पीडित व्यक्ती आणि तिच्या नातेवाईकांचा वेळ वाया जाण्यासोबतच प्रवासाचा आर्थिक भुर्दंडही सहन करावा लागतो.

विशेषतः अत्याचारित महिलेला तपासणीसाठी दूरवर घेऊन जाण्याची प्रक्रिया ही मानसिक आणि शारीरिकदृष्ट्याही त्रासदायक ठरू शकते. आधीच गंभीर मानसिक धक्क्यात असलेल्या पीडितेला पुन्हा दीर्घ प्रवास, प्रतीक्षा आणि गर्दीचा सामना करावा लागतो. त्यामुळे तिची होणारी कुचंबणा थांबविण्यासाठी शिरूरमध्येच आवश्यक वैद्यकीय तपासणीची सुविधा उपलब्ध करून देण्याची मागणी जोर धरत आहे.

शिक्रापूरसारख्या ठिकाणी वैद्यकीय तपासणीची प्रक्रिया स्थानिक पातळीवर होऊ शकते, तर शिरूरसारख्या तालुक्याच्या ठिकाणी ही सुविधा का उपलब्ध करून दिली जात नाही? असा प्रश्न नागरिकांनी उपस्थित केला आहे. शिरूरमध्ये आरोग्य केंद्र, वैद्यकीय अधिकारी आणि आवश्यक आरोग्य यंत्रणा असताना प्रत्येक प्रकरणासाठी ससून रुग्णालयावर अवलंबून राहण्याची वेळ येणे हे प्रशासनाच्या नियोजनावर प्रश्नचिन्ह निर्माण करणारे आहे. “शिरूरमध्ये आरोग्य सुविधा असताना ससूनला जाण्याची सक्ती कशासाठी? पीडितांना न्याय मिळवून देण्याच्या प्रक्रियेतच त्यांची गैरसोय का?” असा संतप्त सवाल नागरिकांनी केला आहे.

शिरूर तालुक्यातील वाढती लोकसंख्या आणि गुन्हेगारीच्या पार्श्वभूमीवर स्थानिक आरोग्य केंद्रातच आवश्यक वैद्यकीय तपासणीची सुविधा उपलब्ध करून देण्यासाठी प्रशासनाने ठोस निर्णय घेण्याची गरज आहे. यासाठी आरोग्य विभाग, पोलीस प्रशासन आणि जिल्हा प्रशासनाने संयुक्तपणे आवश्यक मनुष्यबळ, प्रशिक्षण व तांत्रिक सुविधा उपलब्ध करून द्याव्यात, अशी मागणी होत आहे.
पीडितेचा वेळ, पैसा आणि मानसिक त्रास वाचविण्यासाठी शिरूरमध्येच वैद्यकीय तपासणीची सुविधा द्या; ससूनचा अनावश्यक घाट थांबवा, अशी मागणी आता नागरिकांकडून जोर धरत आहे.