Anshul Kamboj Cricket Career : मॅनचेस्टर कसोटी सामन्यात भारतीय संघाने अंशुल कंबोजला पदार्पणाची संधी दिली आहे. हा उजव्या हाताचा वेगवान गोलंदाज काही दिवसांपूर्वीच इंग्लंडला पोहोचला होता. आता त्याला भारतीय संघाच्या प्लेइंग इलेव्हनमध्ये स्थान मिळाले आहे. अंशुल कंबोजला कसोटी कॅप माजी यष्टीरक्षक-फलंदाज दीप दासगुप्ता यांनी प्रदान केली. अंशुल कंबोज भारताचा ३१८ वा कसोटी खेळाडू बनला आहे. भारतीय संघाने अंशुल कंबोजला अचानक पदार्पणाची संधी का दिली आणि या खेळाडूची खासियत काय आहे? जाणून घेऊया.

कोण आहे अंशुल कंबोज?

अंशुल कंबोजचा जन्म हरियाणातील करनाल येथे 6 डिसेंबर 2000 रोजी झाला. वयाच्या 24 व्या वर्षी हा वेगवान गोलंदाज भारतीय घरेलू क्रिकेटमध्ये आपली छाप पाडत आहे आणि याचे कारण आहे त्याची अचूक गोलंदाजी. अंशुल कंबोजला देशांतर्गत क्रिकेटमध्ये ‘मॅकग्रा’ या नावानेही ओळखले जाते, कारण ऑस्ट्रेलियाचा दिग्गज गोलंदाज ग्लेन मॅकग्रा हा त्याचा आदर्श आहे आणि त्याची गोलंदाजीची विचारसरणीही त्याच्याशी मिळतीजुळती आहे. अंशुल सातत्याने एकाच लांबीवर गोलंदाजी करण्यासाठी प्रसिद्ध आहे. अंशुलची उंची 6 फूट 2 इंच आहे, ज्यामुळे तो स्विंगसह अतिरिक्त उसळी मिळवण्यात यशस्वी होतो.

Test Cap number 3⃣1⃣8⃣ 🙌

Congratulations to Anshul Kamboj, who is all set to make his international Debut! 👏👏

Updates ▶️ https://t.co/L1EVgGu4SI#TeamIndia | #ENGvIND pic.twitter.com/ntZRqsxczF

— BCCI (@BCCI) July 23, 2025

अंशुल कंबोजचे देशांतर्गत क्रिकेटमधील पदार्पण –

अंशुल कंबोजने 2022 मध्ये देशांतर्गत क्रिकेटमध्ये पदार्पण केले. विजय हजारे ट्रॉफीमध्ये त्याने आपली छाप पाडली आणि या गोलंदाजाने 10 सामन्यांत 17 बळी घेतले. या शानदार कामगिरीच्या जोरावर 2024 मध्ये मुंबई इंडियन्सने त्याला आयपीएलमध्ये संधी दिली, परंतु पुढील हंगामात त्याला संघातून मुक्त करण्यात आले. अंशुल कंबोजने केरळविरुद्ध एका डावात 10 बळी घेऊन खळबळ उडवून दिली. अनिल कुंबलेनंतर हा पराक्रम करणारा तो दुसरा भारतीय आणि पहिला वेगवान गोलंदाज ठरला.

हेही वाचा – IND vs ENG : अंशुल कंबोजचे ऐतिहासिक कसोटी पदार्पण, ३५ वर्षांची प्रतीक्षा संपली

धोनी बनला कंबोजचा मार्गदर्शक –

आयपीएल 2025 मध्ये अंशुल कंबोजला चेन्नई सुपरकिंग्जच्या संघात स्थान मिळाले आणि तिथे त्याला एमएस धोनीसारख्या दिग्गजाचा सहवास लाभला. धोनीच्या मार्गदर्शनाखाली त्याच्या खेळाला आणखी पैलू पाडले. धोनीने त्याच्या विचारसरणीवर मोठा प्रभाव टाकला. खरे तर, अंशुल कंबोजकडे नेहमी फलंदाजासाठी खास रणनीती असते, जी तो मैदानावर अंमलात आणतो. याच कारणामुळे धोनी त्याच्यावर खूप खूश दिसला. खुद्द आर. अश्विनने सांगितले की, अंशुल कंबोज हा भारतातील सर्वात प्रतिभावान गोलंदाजांपैकी एक आहे. त्याच्याकडे बुमराह आणि झहीर खान यांच्यासारखी रणनीती आहे.

हेही वाचा – IND vs ENG : भारताच्या प्लेइंग इलेव्हनमध्ये मोठा बदल, २४ वर्षीय गोलंदाजाला मिळाली पदार्पणाची संधी

कंबोजची देशांतर्गत क्रिकेटमधील कामगिरी –

गेल्या तीन वर्षांत कंबोजने प्रथम श्रेणी क्रिकेटमध्ये एकूण 24 सामने खेळले असून त्याने 79 फलंदाजांना बाद केले आहे. याशिवाय, त्याने फलंदाजी करताना 486 धावा देखील केल्या आहेत. त्याची वैयक्तिक सर्वोच्च धावसंख्या नाबाद 51 धावा आहे, जी त्याने मागील सामन्यात इंग्लंड लायन्सविरुद्ध केली होती. त्याच्या नावावर एका डावात दोन वेळा पाच विकेट्स घेण्याचा पराक्रमही आहे. 2024 च्या दुलीप ट्रॉफी स्पर्धेत कंबोजने इंडिया सी साठी तीन सामने खेळले आणि 16 फलंदाजांना बाद केले.