हिंजवडी – आयटीक्षेत्र हे महाराष्ट्रासाठी खूप महत्त्वाचे उद्योगक्षेत्र आहे. अशा आयटी सेक्टरच्या परिसरातील हाऊसिंग सोसायटींधारकांना रस्त्यांची सोय नाही, कचरा उचलला जात नाही, हक्काचे पिण्यासाठी शुद्ध पाणी मिळत नाही, नद्यांची गटारगंगा झाली आहे, मेट्रोला मुहूर्त मिळत नाही, टँकर माफियांचा सुळसुळाट झालाय.

जिथे उद्योग रोजगार आहेत तिथेच मूलभूत समस्या सोडविण्यात राज्यातील महायुती सरकार अपयशी ठरले आहे. असे शिवसेना नेते, युवासेनाप्रमुख आमदार आदित्य ठाकरे यांनी सरकारला सुनावले. समस्‍यांची पाहणी करण्यासाठी आदित्‍य ठाकरे पुन्‍हा हिंजवडी येथे आले असता त्‍यांनी मुख्यमंत्री, पंतप्रधानासह सरकारला खडेबोल सुनावले.

ठाकरे म्हणाले, काही दिवसांपूर्वी आपण हिंजवडीची पाहणी केली होती. बर्‍याचशा समस्या जाणून घेतल्या होत्या. ऑगस्ट महिन्यात चाकण आणि हिंजवडी हे दोन दौरे केले होते. चाकण एमआयडीसीमध्ये वाहतुक कोंडी, रस्त्यांची परिस्थिती, पाण्याचा प्रश्न, कचर्‍याचा प्रश्न असेल यावर आवाज उठवला होता. आता पुढच्या आठवड्यातही आपण चाकणला जाणार आहोत.

आमचा दौरा झाल्यानंतर मुख्यमंत्र्यांनी एक बैठक घेतली. एक पॅकेजही जाहीर केले. समितीही नेमली. येथील समस्या सोडविण्यासंदर्भात जी समिती बसवलेली आहे,खरोखर त्याच्यावर कुठे काम चालू आहे का ? ते जाणण्यासाठी मी आज परत आलो होतो. सध्या ज्वलंत काही विषय किंवा आंदोलन नाहीये, पण येथील नागरिकांसोबत गेल्या दोन-तीन महिन्यामध्ये जो संवाद साधलेला आहे, तो सुरू ठेवण्यासाठी पुन्हा आलो आहे.

यावेळी आयटी एम्प्लॉइज फोरमचे अध्यक्ष पवनजीत माने, शिवसेना संपर्कप्रमुख सचिन पडवळ, सहसंपर्कप्रमुख गजानन थरकुडे, पुणे जिल्हा महिला संघटिका स्वाती ढमाले, राम थरकुडे, सोमनाथ बोडके, ज्ञानेंद्र हुलसुरे यांच्यासह आयटी परिसरातील सोसायट्यांचे प्रतिनिधी मोठ्या संख्येने उपस्थित होते.

मेट्रो उद्घाटनाच्‍या प्रतिक्षेत
देशाच्या ग्रोथ इंजिन असलेल्या आयटी क्षेत्रातील प्रश्न सोडविण्याकडे सरकारचे दुर्लक्ष होत असून, यासाठी आयटीयन्सनी एकजूट दाखवून रस्त्यावर उतरावे लागेल. हिंजवडीतील नागरिकांच्या मूलभूत समस्या सोडविण्यासाठी राजकारण न करता मुख्यमंत्र्यांनी स्वतः लक्ष घालावे, मोठे बिल्डर आणि अदानी-अंबानी यांच्या हिताला प्राधान्य देणारे महायुती सरकार सामान्य नागरिकांच्या प्रश्नांकडे जाणीवपूर्वक दुर्लक्ष करत आहे, असा आरोप ही यावेळी करण्यात आला.

जुलै-ऑगस्टपासून तयार असलेली मेट्रो अद्याप उद्घाटनाच्या प्रतीक्षेत आहे. पंतप्रधानांच्या तारखेची वाट न पाहता मेट्रो सुरू करावी, श्रेय कोणाला घ्यायचे ते घ्यावे, असे आवाहन ही यावेळी आदित्य ठाकरे यांनी केले.

अजूनही परिस्‍िथती जैसे थे
६ सप्टेंबर रोजी हिंजवडीतील खराब रस्ते, सांडपाणी, पाणीपुरवठा आणि वाहतूक कोंडीच्या समस्यांबाबत आयटी कर्मचारी, हाऊसिंग सोसायट्यांचे प्रतिनिधी व नागरिकांनी मूक मोर्चा काढला होता. या आंदोलनानंतर प्रशासनाने उपाययोजनांचे आश्वासन दिले होते. मात्र, अजूनही परिस्थितीत सुधारणा न झाल्याने शिवसेना नेते आदित्य ठाकरे यांनी रविवारी सायंकाळी पुन्हा हिंजवडी आयटी पार्कला भेट दिली.

कर्मचारी व सोसायटी प्रतिनिधींशी चर्चा करून त्यांनी समस्यांचा आढावा घेतला. हिंजवडीसारख्या महत्त्वाच्या आयटी परिसरात मोठ्या कंपन्या असूनही कर्मचाऱ्यांना वाहतूक कोंडी, दूषित पाणी आणि मूलभूत सुविधांच्या अभावाचा सामना करावा लागत आहे. नागरिक कोट्यवधी रुपये खर्चून घरे घेतात आणि कर भरतात, तरीही त्यांना आवश्यक सुविधा मिळत नाहीत.

पीएमआरडीए आणि महापालिकेसारख्या यंत्रणा बिल्डरांना परवानग्या देतात, मात्र पाणीपुरवठा आणि इतर सुविधांची जबाबदारी नेमकी कोण घेणार, असा सवाल आदित्य ठाकरे यांनी उपस्थित केला. तसेच, समस्यांवर उपाययोजना करण्यासाठी नेमलेल्या समितीच्या कामकाजाची प्रत्यक्ष स्थिती जाणून घेण्यासाठी आपण पुन्हा भेट दिल्याचे त्यांनी सांगितले.

ठोस कृती आराखडा नाही
आयटी परिसरातील पायाभुत सुविधांबाबतची कामे डिसेंबरपासून सुरू करण्यात येतील, असे प्रशासन सांगत असले, तरी त्यासाठीजी काही प्रक्रिया राबवायला पाहिजे, ती राबवली गेलेली आहे का? त्याबाबतचा ठोस कृती आराखडा दिसत नाही.अपघातांचे प्रमाण वाढले असून, रस्त्यांवर केवळ तात्पुरती डागडुजी केली जात आहे.

समस्या सर्वत्र दिसतात. मात्र, त्यावर ठोस तोडगा कुठेच दिसत नाही. तात्पुरती डागडुजी करून मुख्यमंत्री कधी काही आदेश देतात, मग उपमुख्यमंत्री काही वेगळे बोलतात असे सध्याचे चित्र आहे.

Rajgurunagar : टोरंट कंपनी हटाव, भीमाशंकर बचाव’ घोषणांनी राजगुरुनगर दणाणले