Disha Salian Case : दिवंगत अभिनेता सुशांत सिंह राजपूतची माजी व्यवस्थापक दिशा सालियन हिच्या मृत्यू प्रकरणात मोठी अपडेट समोर आली आहे. या प्रकरणात केंद्रीय अन्वेषण विभागाने (CBI) गुन्हा दाखल केला आहे. या एफआयआरमध्ये शिवसेना ठाकरे गटाचे नेते आदित्य ठाकरे यांच्यासह काही बॉलिवूड कलाकार आणि पोलिस अधिकाऱ्यांच्या नावांचा उल्लेख करण्यात आला आहे.

दिशा सालियनचे वडील सतीश सालियन यांच्या तक्रारीच्या आधारे ही एफआयआर दाखल करण्यात आल्याची माहिती आहे. त्यांच्या जबाबाचाही एफआयआरमध्ये उल्लेख आहे. सतीश सालियन यांनी आदित्य ठाकरे, दिनो मोरिया, रिया चक्रवर्ती, तत्कालीन मुंबई पोलीस आयुक्त परमबीर सिंह, पोलीस अधिकारी सचिन वाझे यांच्यासह इतर काही पोलिसांविरोधात कारवाई करण्याची मागणी केली होती.

सरकारी यंत्रणेचा गैरवापर करून दिशा सालियनच्या मृत्यूशी संबंधित पुरावे नष्ट केल्याचा आरोप त्यांनी केला आहे.

एफआयआरमध्ये आणखी कोणाची नावे?

एफआयआरमध्ये अभिनेता सूरज पंचोली आणि डिनो मोरिया यांच्याही नावांचा उल्लेख असल्याची माहिती आहे. ८ जून २०२० रोजी मालवणी येथील एका इमारतीच्या १४ व्या मजल्यावरून पडल्याने दिशा सालियनचा मृत्यू झाला होता. सुरुवातीला हा अपघात किंवा आत्महत्या असल्याचे सांगण्यात आले होते. मात्र, तिच्या मृत्यूमागे घातपात असल्याचा संशयही व्यक्त करण्यात आला.

समोर आलेल्या माहितीनुसार, तत्कालीन मुख्यमंत्री उद्धव ठाकरे, आदित्य ठाकरे, तत्कालीन गृहमंत्री अनिल देशमुख यांच्यासह डिनो मोरिया, सूरज पंचोली, रिया चक्रवर्ती आणि शौविक चक्रवर्ती यांच्या भूमिकेची चौकशी होऊ शकते.

दिशा सालियनचे वडील सतीश सालियन यांनी चौकशीसाठी मुंबई उच्च न्यायालयात याचिका दाखल केली होती. त्यानंतर न्यायालयाच्या आदेशानुसार या प्रकरणाचा तपास सीबीआयकडे सोपवण्यात आला.

सीबीआयकडून अधिकाऱ्याची नियुक्ती

या प्रकरणाच्या तपासासाठी सीबीआय दिल्ली मुख्यालयातील विशेष पोलीस उपअधीक्षक (DSP) पुरण सिंह यांची नियुक्ती करण्यात आली आहे. त्यांच्या नेतृत्वाखालील पथक दिशा सालियनच्या मृत्यूची चौकशी करणार आहे. तसेच एफआयआरमध्ये उल्लेख असलेल्या व्यक्तींच्या भूमिकेचीही तपासणी केली जाण्याची शक्यता आहे.

पोलीस आणि फॉरेन्सिक पथकाचीही चौकशी –

एफआयआरमध्ये तत्कालीन पोलीस आयुक्त परमबीर सिंह, सचिन वाझे, डीसीपी विशाल ठाकूर, मालवणी पोलीस ठाण्यातील वरिष्ठ अधिकारी, विशेष तपास पथकाचे सदस्य आणि कलिना येथील फॉरेन्सिक विज्ञान प्रयोगशाळेतील तज्ज्ञांच्या भूमिकेचाही उल्लेख करण्यात आला आहे.

सरकारी निधी, यंत्रणा आणि पोलिसांचा गैरवापर करून संबंधित व्यक्तींना वाचवण्याचा प्रयत्न झाल्याचा आरोप सतीश सालियन यांनी केला आहे. आता सीबीआयच्या तपासातून या आरोपांमध्ये किती तथ्य आहे, तसेच दिशा सालियनच्या मृत्यूमागील नेमके कारण काय होते, हे स्पष्ट होणार आहे.