Pune Crime News : पुणे शहरात सातत्याने वाढणाऱ्या गुन्हेगाराच्या घटनांमुळे पोलिसांच्या कारवाईवर प्रश्न उपस्थित करण्यात येत आहे. पुण्यात अजूनही कोयता गँगची दहशत असून अनेक धक्कादायक घडत आहेत. आता पुण्यातील कात्रज परिसरात टोळक्याकडून तरुणावर प्राणघातक हल्ला केल्याची धक्कादायक घटना घडली आहे. या घटनेमुळे एकच खळबळ उडाली असून, परिसरात भीतीचे वातावरण पसरले आहे. पुण्यात कोयते आणि तलवारी हातात घेत टोळक्याने धुडगूस घातल्याचा धक्कादायक प्रकार समोर आला आहे. कात्रज परिसरात टोळक्याकडून एका तरुणावर तलवारी आणि कोयत्याने सात ते आठ जणांकडून प्राणघातक हल्ला करण्यात आला आहे. हल्ला केल्यानंतर हल्लेखोरांनी घटनास्थळावरून पळ काढला. या हल्ल्यात तरुण गंभीर जखमी झाला असून, त्याला उपचारांसाठी भारती हॅास्पिटलमध्ये दाखल करण्यात आले आहे. कात्रज कोंढवा रोड परिसरात असणाऱ्या एसबीआय बँकेसमोर ही घटना घडली आहे. ओंकार साबळे या तरुणावर हा प्राणघातक हल्ला करण्यात आला आहे. ओंकार हा ठाकरे गटाच्या पदाधिकाऱ्याच्या भाऊ असल्याची माहिती मिळत आहे. या प्रकरणी पोलिसांनी गुन्हा दाखल केला असून, आरोपींचा शोध घेतला जात आहे.
