Sudhir Mungantiwar : ३० जूनपासून महाराष्ट्र राज्य विधिमंडळाच्या पावसाळी अधिवेशाला सुरूवात झाली. या अधिवेशनात राज्यातील विविध मुद्यांवर विरोधी पक्षाकडून सरकारला घेराव घातला जात आहे. यामुळे सत्ताधारी आणि विरोधक यांच्यात विधानसभेत खंडाजंगी पाहायला मिळत आहे.

अशातच माजी मंत्री आणि भाजप नेते सुधीर मुनगंटीवार यांनी आपल्याच सरकारला धारेवर धरले आहे. अधिवेशनाच्या पहिल्याच दिवसापासून मुनगंटीवार अनेक सवाल उपस्थित करत आहेत. सोमवारी ७ जुलै त्यांनी विधानसभेत ओवायओचा (OYO) मुद्दा उपस्थित करत सरकारला जाब विचारला आहे. पुरवणी मागण्यांवरील चर्चेदरम्यान मुनगंटीवार यांनी ओयो हॉटेलचा मुद्दा उपस्थित केला आहे.

ओयोमध्ये एका तासासाठी खोली भाड्याने का मिळते? शहरांपासून दूर असणाऱ्या या हॉटेल्समध्ये नेमकं काय सुरु असते? असा सवाल माजी मंत्री आमदार सुधीर मुनगंटीवार यांनी सरकारला केला आहे. तसेच हा अभ्यासाचा विषय आहे, यात पोलीस विभागाने अभ्यास करावा अशी मागणी देखील त्यांनी केली आहे. OYO  हॅाटेल्सचा मुद्दा उपस्थित करून त्यांनी सरकारचे लक्ष याकडे वेधले आहे.

या मुद्यावर बोलताना मुनगंटीवार यांनी गृहराज्यमंत्र्यांना जाब विचारत संस्कृती रक्षकाचं सरकार आहे, इथे जर संस्कृतीचा ऱ्हास होत असेल, तर गृहराज्यमंत्री बसले आहेत. त्यांनी OYO चा अभ्यास करावा आणि महाराष्ट्रात किती OYO आहेत, याची माहिती देण्याची आवश्यकता असल्याचे ते म्हणाले.

नेमंक काय म्हणाले सुधीर मुनगंटीवार?

ओयो नावाची एक हॉटेल चेन तयार झाली आहे. शहराच्या 20-20 किमी दूर एका निर्जन ठिकाणी OYO… मग मनात शंका आली की ही OYO हॉटेल चेन काय आहे? ही अतिशय गंभीर बाब सरकारने लक्ष देण्याची आहे. या हॉटेलसाठी कोणत्याही ग्रामपंचायतची परवानगी घेतली जात नाही, कोणत्याही नगर परिषदची परवानगी घेतली जात नाही, अशी माहिती मुनगंटीवार यांनी विधानसभेत दिली. या हॉटेलमध्ये एका तासासाठी खोली भाड्याने मिळते, ही कशासाठी दिली जाते, हा पोलीस विभागाच्या अभ्यासाचा विषय आहे, असे सुधीर मुनगंटीवार यांनी सांगितले.