Eknath Khadse : भाजपचे राष्ट्रीय सरचिटणीस विनोद तावडे यांनी नुकतीच राष्ट्रवादी काँग्रेस (शरदचंद्र पवार) पक्षाचे ज्येष्ठ नेते एकनाथ खडसे यांच्या निवासस्थानी भेट दिल्यानंतर त्यांच्या भाजपमध्ये पुनरागमनाच्या चर्चांना वेग आला होता. मात्र, या चर्चा सुरू असतानाच एकनाथ खडसे यांनी मुंबईत ‘मातोश्री’वर जाऊन शिवसेना (ठाकरे गट) प्रमुख उद्धव ठाकरे यांची भेट घेतल्याने राज्याच्या राजकारणात नव्या चर्चांना तोंड फुटले आहे.

या भेटीदरम्यान शिवसेना (ठाकरे गट)चे खासदार संजय राऊतही उपस्थित होते. त्यामुळे खडसे यांच्या पुढील राजकीय वाटचालीबाबत विविध तर्क-वितर्क रंगू लागले. भाजपमध्ये घरवापसी होणार की वेगळीच राजकीय समीकरणे आकार घेणार, याबाबत राजकीय वर्तुळात उत्सुकता वाढली आहे. त्यामुळे एकनाथ खडसेंच्या मनात नेमकं चाललयं तरी काय? असा सवाल विचारला जात आहे.

चर्चांवर एकनाथ खडसेंचं स्पष्टीकरण

दरम्यान, उद्धव ठाकरे यांच्या भेटीनंतर माध्यमांशी बोलताना एकनाथ खडसे यांनी या भेटीमागील कारण स्पष्ट केले. पुढील महिन्यात होणाऱ्या त्यांच्या अमृत महोत्सवी वाढदिवस सोहळ्याचे निमंत्रण देण्यासाठी कार्यकर्त्यांसह उद्धव ठाकरे यांची सदिच्छा भेट घेतल्याचे त्यांनी सांगितले. ही केवळ औपचारिक भेट असून, तिचा कोणत्याही राजकीय घडामोडी किंवा पक्षप्रवेशाशी संबंध नसल्याचे त्यांनी स्पष्ट केले.

हेही वाचा : PM Modi visits New Zealand: ४० वर्षानंतर भारतीय पंतप्रधानांची न्यूझीलंडला भेट ; मोदींची भेट एवढी का महत्वाची ? वाचा

एकनाथ खडसे यांनी भाजपमध्ये चार दशकांहून अधिक काळ काम केल्यानंतर पक्षाला रामराम ठोकत राष्ट्रवादी काँग्रेसमध्ये प्रवेश केला होता. त्यानंतर वेळोवेळी त्यांच्या भाजपमधील पुनरागमनाच्या चर्चा होत राहिल्या आहेत. अलीकडे विनोद तावडे यांच्या भेटीनंतर त्या चर्चांना आणखी बळ मिळाले होते. मात्र, त्यानंतर झालेल्या ‘मातोश्री’ भेटीमुळे राजकीय चर्चांना वेगळे वळण मिळाले आहे.

आज मातोश्री येथे जाऊन शिवसेना प्रमुख बाळासाहेब ठाकरे यांना अभिवादन केले तसेच शिवसेना UBT पक्ष प्रमुख व माजी मुख्यमंत्री मा.श्री. उद्धव जी ठाकरे यांची सदिच्छा भेट घेतली. यावेळी खासदार संजय जी राऊत उपस्थित होते. @OfficeofUT @rautsanjay61 pic.twitter.com/8pfZCu1g1R

— Eknath Khadse (@EknathGKhadse) July 10, 2026

राजकीय विश्लेषकांनी एकनाथ खडसे यांच्या भेटीचा राजकीय अर्थ काढला असून, सध्या तरी ते राष्ट्रवादी काँग्रेस शरद पवार गटासोबत राहणेच पसंत करतील. आमदारकी सोडून भाजपमध्ये प्रवेश करण्याची शक्यता फारशी दिसत नाही. असे असले तरी एकनाथ खडसे यांच्या पुढील राजकीय भूमिकेकडे राज्याचे लक्ष लागून राहिले आहे.

हेही वाचा : Curd Recipes: दह्यापासून बनवा ५ झटपट हेल्दी रेसिपी; चवही जबरदस्त, पोषणही भरपूर!