Dhananjay Munde : “आयुष्यात काही प्रसंग…”; धनंजय मुंडेंची भावनिक पोस्ट; वाढदिवसनिमित्ताने कार्यकर्त्यांना केले ‘हे’ आवाहन
Dhananjay Munde : जनतेच्या विकासासाठी आयुष्यभर झटणारा एक मोठा नेता आपण गमावला असून, अशा परिस्थितीत कोणत्याही प्रकारचा उत्सव साजरा करणे मनाला पटत नसल्याचे त्यांनी पोस्टमध्ये नमूद केले.
Dhananjay Munde : माजी मंत्री तथा परळीचे आमदार धनंजय मुंडे यांनी १५ जुलै रोजी होणारा आपला वाढदिवस कोणताही जल्लोष न करता समाजोपयोगी उपक्रमांद्वारे साजरा करण्याचे आवाहन कार्यकर्ते, पदाधिकारी, मित्रपरिवार आणि परळी विधानसभा मतदारसंघातील नागरिकांना केले आहे. याबाबत त्यांनी सोशल मीडियावर सविस्तर पोस्ट शेअर केली आहे.
फेसबुक पोस्टमध्ये धनंजय मुंडे (Dhananjay Munde ) यांनी म्हटले आहे की, आयुष्यात काही प्रसंग असे असतात, जे उत्सव साजरा करण्यापेक्षा समाजाप्रती असलेल्या जबाबदारीची जाणीव करून देतात. दिवंगत उपमुख्यमंत्री तथा लोकनेते अजितदादा पवार यांच्या अकाली निधनामुळे संपूर्ण राज्य शोकाकुल आहे. जनतेच्या विकासासाठी आयुष्यभर झटणारा एक मोठा नेता आपण गमावला असून, अशा परिस्थितीत कोणत्याही प्रकारचा उत्सव साजरा करणे मनाला पटत नसल्याचे त्यांनी पोस्टमध्ये नमूद केले. (Dhananjay Munde)
याशिवाय, परळी विधानसभा मतदारसंघासह परिसरात कमी पावसामुळे शेतकरी आणि सर्वसामान्य नागरिक अडचणीत आहेत. पावसाच्या प्रतीक्षेत असलेल्या शेतकऱ्यांच्या वेदना लक्षात घेता वाढदिवसाचा जल्लोष करणे योग्य वाटत नसल्याचेही त्यांनी स्पष्ट केले. त्यामुळे १५ जुलै रोजी कोणत्याही प्रकारचे बॅनर, पोस्टर्स, होर्डिंग्ज, स्वागत कमानी, फटाक्यांची आतषबाजी, मिरवणुका किंवा अन्य उत्सवी कार्यक्रम आयोजित करू नयेत, अशी कळकळीची विनंती त्यांनी कार्यकर्त्यांना केली आहे. (Dhananjay Munde)
पोस्टद्वारे महत्वाचे आवाहन (Dhananjay Munde)
वाढदिवसानिमित्त समाजोपयोगी कार्य करण्याचे आवाहन करत त्यांनी प्रत्येकाने किमान एक वृक्ष दत्तक घ्यावा, गरजू विद्यार्थ्यांना शालेय साहित्य द्यावे, अडचणीत असलेल्या शेतकरी कुटुंबांना मदतीचा हात द्यावा, वाचनालयांना पुस्तके भेट द्यावीत आणि गरजू कुटुंबांच्या चेहऱ्यावर हसू फुलविण्याचा प्रयत्न करावा, असे आवाहन केले.
धनंजय मुंडेंनी काढली अजिदादांची आठवण (Dhananjay Munde)
“माझ्यासाठी वाढदिवस म्हणजे केवळ शुभेच्छांचा दिवस नाही, तर समाजाचे ऋण फेडण्याचा संकल्प करण्याची संधी आहे. तुमच्याकडून होणारे प्रत्येक समाजोपयोगी कार्य हीच माझ्यासाठी सर्वात मोठी भेट असेल. समाजसेवेच्या माध्यमातून दिवंगत अजितदादांना खरी आदरांजली अर्पण करूया,” असे भावनिक आवाहन धनंजय मुंडे यांनी आपल्या पोस्टच्या शेवटी केले आहे.
