Wagholi News – भारत निवडणूक आयोगाच्या निर्देशानुसार सुरू असलेल्या विशेष सखोल मतदार यादी पुनरिक्षण (एसआयआर) मोहिमेला वाघोली तसेच परिसरातील गावांमध्ये वेग आला आहे. शिरूर विधानसभा मतदारसंघातील सर्वाधिक मतदारसंख्या असलेल्या वाघोलीमध्ये बूथस्तरीय अधिकारी (बीएलओ) घराघरांत जाऊन गणना पत्रके भरून घेत असून मतदारांची आवश्यक माहिती संकलित केली जात आहे. पात्र मतदारांनी आवश्यक कागदपत्रांसह माहिती संबंधित बीएलओकडे जमा करण्याचे आवाहन प्रशासनाने केले आहे.

निवडणूक आयोगाच्या कार्यक्रमानुसार 30 जून ते 29 जुलै 2026 या कालावधीत बीएलओमार्फत गणना पत्रकांचे वितरण, अर्ज भरणे आणि संकलनाचे काम सुरू आहे. त्यानंतर 5 ऑगस्ट 2026 रोजी मतदार यादीचा मसुदा प्रसिद्ध केला जाणार असून, 5 ऑगस्ट ते 4 सप्टेंबरदरम्यान दावे व आक्षेप स्वीकारले जातील. त्यावरील सुनावणी आणि निर्णय प्रक्रिया 3 ऑक्टोबरपर्यंत पूर्ण करून 7 ऑक्टोबर 2026 रोजी अंतिम मतदार यादी प्रसिद्ध करण्यात येणार आहे.

मतदार यादीत नाव कायम राहण्यासाठी नागरिकांनी अर्ज अचूक भरून संबंधित बीएलओकडे वेळेत जमा करावेत, असे प्रशासनाने स्पष्ट केले आहे. तसेच मतदार यादीतील पत्त्यावर न आढळणारे, कायमस्वरूपी स्थलांतरित झालेले, दुबार नोंद असलेले किंवा मृत मतदार यांची स्वतंत्र नोंद करण्यात येणार असून, आवश्यक सुनावणीनंतर अशा नावांबाबत नियमानुसार कार्यवाही केली जाणार आहे. वाघोलीमध्ये एकूण 60 मतदान केंद्रांचा समावेश असून मतदारांच्या सोयीसाठी सातव हायस्कूल शेजारील कल्याण मंगल कार्यालयात विशेष शिबिर आयोजित करण्यात आले आहे.

या शिबिरात मोठ्या संख्येने मतदारांनी अर्ज भरून जमा केले आहेत. परिसरातील इतर मोठ्या गावांमध्येही ही मोहीम प्रभावीपणे राबविण्यात येत असून मतदारांपर्यंत पोहोचण्यासाठी प्रशासन विविध उपाययोजना करत आहे. प्रशासनाने सर्व राजकीय पक्ष, त्यांचे पदाधिकारी, बूथस्तरीय प्रतिनिधी (बीएलए) तसेच नागरिकांनी या विशेष सखोल पुनरिक्षण मोहिमेत सक्रिय सहभाग नोंदवून मतदार यादी अधिक अचूक आणि विश्वासार्ह करण्यासाठी सहकार्य करावे, असे आवाहन केले आहे.