Indapur News – मतदार यादी विशेष पुनर्रचना (एसआयआर) अभियान प्रभावीपणे राबविण्यासाठी इंदापूर शहरात नगर परिषद, प्रशासन आणि लोकप्रतिनिधी यांच्या समन्वयातून व्यापक जनजागृती मोहीम सुरू असून, या अभियानाने राज्यासाठी आदर्श निर्माण करण्याच्या दिशेने दमदार पाऊल टाकले आहे. इंदापूर शहरातील सरस्वती नगर, मंडई परिसर, अंबिका देवी मंदिर, दत्त मंदिर, श्रीराम सोसायटी, व्यंकटेश नगर, चांदतारा चौक, आंबेडकर नगर तसेच नामदेव मंदिर परिसरात आयोजित एसआयआर कॅम्पना इंदापूर नगर परिषदेचे नगराध्यक्ष भरत शहा यांनी भेट देऊन कामकाजाची पाहणी केली.

नागरिकांशी संवाद साधत त्यांनी मतदार यादी पुनर्रचना अभियानात सक्रिय सहभाग नोंदविण्याचे आवाहन केले. यावेळी राष्ट्रवादी काँग्रेसचे इंदापूर नगर परिषदेचे गटनेते शकील सय्यद तसेच नगरसेवक अक्षय सूर्यवंशी, शुभम पवार, उमेश मखरे, प्रशांत उंबरे, प्रवीण हरणावळ, निखिल महाजन आणि अजिंक्य जावीर उपस्थित होते. सर्व लोकप्रतिनिधींनी विविध भागांतील कॅम्पना भेटी देत नागरिकांच्या अडचणी जाणून घेतल्या व आवश्यक कागदपत्रांबाबत मार्गदर्शन केले.

यावेळी नगराध्यक्ष शहा म्हणाले, लोकशाहीचा पाया सक्षम आणि अचूक मतदार यादीवर उभा असतो. त्यामुळे शहरातील एकही पात्र मतदार मतदार यादीपासून वंचित राहू नये, यासाठी इंदापूर शहरात नियोजनबद्ध पद्धतीने एसआयआर अभियान राबविण्यात येत आहे. शहरातील २५ हजार मतदारांपर्यंत या अभियानाची माहिती पोहोचविण्याची प्रभावी व्यवस्था करण्यात आली असून, प्रत्येक नागरिकाने २९ जुलैपूर्वी आपली नोंद, दुरुस्ती अथवा पडताळणीची प्रक्रिया पूर्ण करून लोकशाही अधिक बळकट करण्यासाठी सहकार्य करावे.

शहा पुढे म्हणाले, कृषिमंत्री दत्तात्रय भरणे यांच्या मार्गदर्शनाखाली तसेच पुणे जिल्हा मध्यवर्ती सहकारी बँकेचे संचालक आप्पासाहेब जगदाळे यांच्या सहकार्य व मार्गदर्शनातून इंदापूर नगरपरिषद नागरिकाभिमुख प्रशासनाची भूमिका प्रभावीपणे पार पाडत आहे. राज्य शासन, केंद्र शासन तसेच विविध शासकीय विभागांच्या सर्वसामान्य नागरिकांसाठी असलेल्या योजना, सुविधा आणि कल्याणकारी उपक्रम प्रत्येक पात्र लाभार्थ्यापर्यंत पोहोचविण्यासाठी नगर परिषद सातत्याने कार्यरत आहे.

एसआयआर अभियान हे देखील नागरिकांच्या लोकशाही हक्कांचे संरक्षण करणारे महत्त्वपूर्ण अभियान असून, त्यात प्रत्येक नागरिकाचा सहभाग अत्यावश्यक आहे. एसआयआर कॅम्पमध्ये नव्या मतदारांची नोंदणी, नावातील दुरुस्ती, पत्त्यातील बदल, आवश्यक कागदपत्रांची पडताळणी आणि मतदार यादी अद्ययावत करण्याबाबत नागरिकांना सविस्तर मार्गदर्शन करण्यात आले. इंदापूर नगर परिषदेने प्रशासनाच्या सहकार्याने राबविलेली ही व्यापक जनजागृती मोहीम आणि लोकप्रतिनिधींचा थेट सहभाग यामुळे ‘इंदापूरचा एसआयआर पॅटर्न’ राज्यासाठी आदर्श ठरण्याची चिन्हे स्पष्ट दिसत आहेत.