Vivekanand patil : महाराष्ट्राच्या राजकारणात सध्या गोकुळ दूध संघाच्या सत्तासंघर्षाची जोरदार चर्चा सुरू आहे. एका बाजूला गोकुळमध्ये सत्तेची समीकरणं बदलण्याची शक्यता निर्माण करणारा सरकारचा अध्यादेश, तर दुसऱ्या बाजूला या निर्णयाविरोधात रस्त्यावर उतरलेले सतेज पाटील. मात्र, कोल्हापुरातील या राजकीय रणांगणात आणखी एका तरुण वक्त्याने सगळ्यांचं लक्ष वेधून घेतलं.

एमपीएससी विद्यार्थ्यांच्या आंदोलनातून आपल्या आक्रमक भाषणशैलीमुळे चर्चेत आलेल्या विवेकानंद पाटील यांनी थेट भाजपचे ज्येष्ठ नेते आणि मंत्री चंद्रकांत पाटील यांनाच निवडणुकीचं आव्हान दिलं. “कोल्हापुरातील कोणत्याही मतदारसंघातून त्यांनी निवडणूक लढवावी, मी अपक्ष उभा राहतो; नाहीतर थेट कोथरूडमध्येच फॉर्म भरतो,” असं म्हणत विवेकानंद यांनी राजकीय वर्तुळात चर्चेला नवा विषय दिला आहे.

कोल्हापूर जिल्हा सहकारी दूध उत्पादक संघ अर्थात गोकुळच्या निवडणुकीत सतेज पाटील यांच्या नेतृत्वाखालील समविचारी आघाडीने २५ पैकी १३ जागा जिंकल्या, तर महायुतीच्या पॅनेलला १२ जागा मिळाल्या. मात्र, अध्यक्षपदाच्या निवडीवेळी आवश्यक गणपूर्ती न झाल्याने निवड प्रक्रिया रखडली.

याच पार्श्वभूमीवर राज्य मंत्रिमंडळाने ५०० कोटी रुपयांपेक्षा अधिक वार्षिक उलाढाल असलेल्या पात्र सहकारी संस्थांच्या व्यवस्थापन समित्यांवर पाच शासननियुक्त सदस्य नेमण्याच्या प्रस्तावाला मंजुरी दिली. यापैकी चार सदस्यांना मतदानाचा अधिकार असेल, तर पाचवा सदस्य शासकीय अधिकारी असेल. या निर्णयामुळे गोकुळमधील सत्तेचं गणित बदलू शकतं, अशी चर्चा सुरू झाली.

सरकारचा हा निर्णय गोकुळमध्ये मागच्या दाराने सत्ता मिळवण्याचा प्रयत्न असल्याचा आरोप सतेज पाटील आणि विरोधकांकडून केला जात आहे. या अध्यादेशाला न्यायालयात आव्हानही देण्यात आले आहे. त्याच निर्णयाच्या निषेधार्थ ९ नोव्हेंबरला सतेज पाटील यांच्या नेतृत्वाखाली कोल्हापुरात संघर्ष मोर्चा काढण्यात आला.

या मोर्चात विवेकानंद पाटील यांची उपस्थिती आणि त्यांचं भाषण विशेष चर्चेचा विषय ठरलं. त्यांनी आपल्या भाषणात अमूल कंपनीच्या चॉकलेटचा उल्लेख करत एका नेत्याला लक्ष्य केलं. ते म्हणाले, “काल मी एका नेत्याचा फोटो पाहिला. हा नेता अमूल कंपनीचं चॉकलेट देत होता. का बरं? या नेत्याला गोकुळचं चॉकलेट सापडलं नाही का? नुसतं अमूल-अमूल करत आहेत.”

या टोमण्यातून त्यांनी गोकुळच्या स्थानिक अस्मितेचा मुद्दा उपस्थित केला. गोकुळसारख्या कोल्हापूरच्या महत्त्वाच्या सहकारी संस्थेच्या प्रश्नावर बाहेरच्या ब्रँडचा उल्लेख करत त्यांनी विरोधकांना चिमटा काढला.

“चंद्रकांत पाटलांनी कुठूनही लढावं, मी अपक्ष उभा राहतो!”

भाषणाचा सर्वाधिक चर्चेचा भाग ठरला तो चंद्रकांत पाटील यांना दिलेलं आव्हान. विवेकानंद पाटील म्हणाले, “ते कुठले आहेत हे मला माहिती आहे. त्यांनी कोल्हापूरच्या कोणत्याही विधानसभा मतदारसंघातून फॉर्म भरावा. हा पठ्ठ्या अपक्ष उभा राहील. नाहीतर चंद्रकांत पाटलांच्या कोथरूडमधूनच अपक्ष म्हणून फॉर्म भरून टाकतो,” असं त्यांनी मिश्कीलपणे सांगितलं. त्यांच्या या विधानानंतर उपस्थितांमध्ये एकच चर्चा रंगली.

२०२९ मध्ये विवेकानंद पाटील निवडणुकीच्या मैदानात उतरणार?

एमपीएससी आंदोलनापासून विवेकानंद पाटील यांच्या राजकीय भवितव्याबद्दल चर्चा सुरू आहे. त्यांच्या भाषणशैलीची दखल विविध राजकीय नेत्यांनी घेतली आहे. आता सतेज पाटील यांच्या मोर्चात त्यांनी थेट भाजपच्या मंत्र्याला आव्हान दिल्याने या चर्चेला आणखी हवा मिळाली आहे.

मात्र, विवेकानंद पाटील यांनी २०२९ ची विधानसभा निवडणूक लढवण्याची अधिकृत घोषणा केलेली नाही. तसेच कोणत्या पक्षाकडून निवडणूक लढवणार, याबाबतही त्यांनी स्पष्ट भूमिका मांडलेली नाही. सध्या तरी त्यांचं विधान हे राजकीय आव्हान आणि संभाव्य वाटचालीचे संकेत म्हणून पाहिलं जात आहे.