विश्रांतवाडी : भव्य वीस फुटी शिवलिंग व बारा ज्योतिर्लिंगांचे दर्शन घेण्यासाठी तसेच, मोफत बाल मेळाव्यात परिसरातील हजारो बाल गोपाळांनी हजेरी लावली. धानोरीच्या माजी नगरसेविका रेखा टिंगरे व कमल फाऊंडेशन यांच्यावतीने चैतन्य गगनगिरी मंगल कार्यालय येथे या कार्यक्रमाचे आयोजन करण्यात आले होते.

या कार्यक्रमाला वरिष्ठ पोलीस निरीक्षक कांचन जाधव, कोकणस्थ प्रगती संघाचे अध्यक्ष जयराम जाधव, मनोहर खेतले, सुनील गायकवाड, सुनील मोरे, सचिन खांदवे उपस्थित होते. प्रमुख प्रमुख पाहुण्यांनी रेखा टिंगरे यांच्या या उपक्रमाचे कौतुक केले. गगनगिरी मंगल कार्यालय येथे शिवभक्तांच्या सोयीसाठी सुमारे वीस फूट लांबीचे भव्य शिवलिंग तसेच बारा ज्योतिर्लिंगांच्या प्रतिकृती ठेवण्यात आल्या होत्या. त्याचबरोबर भगवान शंकर व छत्रपती शिवाजी महाराज यांच्या मूर्ती दर्शनासाठी ठेवण्यात आल्या होत्या. दर्शनासाठी येणाऱ्या भाविकांना दही – खिचडी व केळींचे वाटप करण्यात आले. बाल गोपळांसाठी मोफत बाल मेळाव्याचेही आयोजन करण्यात आले होते.

शिवभक्तांना एकाच ठिकाणी बारा ज्योतिर्लिंगांचे दर्शन घेता यावे या उद्देशाने दरवर्षी बारा ज्योतिर्लिंग दर्शनाचे आयोजन करण्यात येते, असे माजी नगरसेविका रेखा टिंगरे यांनी सांगितले. मोफत बाल मेळाव्यात मिनी ट्रेन, उंट व घोडा रपेट, पाळणा, जम्पिंग जॅक, ट्रॅम्पुलीन हे खेळ तसेच भेळ, पाणीपुरी, डोसा, शुगर कॅन्डी, पॉपकॉर्न आदी खाद्यपदार्थ मोफत उपलब्ध करून दिले होते. सुमारे वीस हजार भाविकांनी दर्शन व प्रसादाचा लाभ घेतला. तसेच, मोफत बालमेळाव्याचा परिसरातील सुमारे दहा हजार बालकांनी आनंद घेतल्याची माहिती कमल फाऊंडेशनचे अध्यक्ष चंद्रकांत टिंगरे यांनी दिली.