Viral News – शिरूर तालुक्यातील तांदळी येथील ७५ वर्षीय केरबा बाबूराव खोरे यांच्या पंढरपूर वारीदरम्यान एका वृत्तवाहिनीवर प्रसारित झालेल्या मुलाखतीने महाराष्ट्राचे लक्ष वेधून घेतले. आयुष्यभर दुःखाचे डोंगर पेलत एकाकी जीवन जगणाऱ्या वृद्ध शेतकऱ्याची हृदयस्पर्शी व्यथा राज्यभर पोहोचताच सोशल मीडियावर मोठा प्रतिसाद मिळाला. याची दखल घेत प्रशासनही खोरे यांच्या मदतीसाठी पुढे सरसावले.

आमदार माऊली कटके, तहसीलदार बाळासाहेब म्हस्के यांनी प्रशासकीय पातळीवर हातभार लावला आहे. पत्नी व मुलांचे निधन, शेतीवरील हक्क गमावणे आणि हलाखीच्या परिस्थितीत दिवस काढणारे केरबा खोरे आजही स्वतःची सर्व कामे स्वतःच करीत जीवन जगत आहेत. त्यांच्या संघर्षमय जीवनकथेने अनेकांच्या डोळ्याच्या कडा ओलावल्या.

घटनेची माहिती मिळताच शिरूरचे तहसीलदार बाळासाहेब म्हस्के यांनी तांदळी येथे जाऊन खोरे यांच्या घराची पाहणी केली. आमदार माउली कटके यांनीही भेट देऊन त्यांच्या अडचणी जाणून घेतल्या. आमदार माउली कटके यांनीही शासन स्तरावर तसेच वैयक्तिक पातळीवर आवश्यक ती सर्व मदत करण्याचे आश्वासन दिले.

यावेळी घोडगंगा कारखान्याचे माजी संचालक सुभाष कळसकर, माजी पंचायत समिती सदस्य राजेंद्र गदादे, तलाठी दीपक जाधव, गणेश गदादे, काळुराम खोरे, आश्रत गदादे, अजित शेलार, ऋषिकेश खोरे, ऋषी निंबाळकर, दत्तात्रेय नलगे, दत्तात्रेय गदादे, नंदकुमार कुलकर्णी, लक्ष्मण कळसकर, गोरख खोरे, अर्जुन जगताप, पंडित खोरे उपस्थित होते.

महसूल प्रशासनाकडून तातडीने कार्यवाही
तहसीलदार म्हस्के यांनी प्रशासनाकडून मिळणाऱ्या विविध योजनांचा आढावा घेत आवश्यक त्या उपाययोजना तातडीने राबविण्याचे निर्देश दिले. खोरे यांच्या नावावरील १३ गुंठे जमिनीची मोजणी करून त्यांना प्रत्यक्ष ताबा मिळवून देण्यासाठी कार्यवाही केली जाईल, पीएम-किसान योजनेचा लाभ मिळवून देण्यासाठी प्रयत्न करण्यात येतील, असे तहसीलदार म्हस्के सांगितले.