Takali Haji- शिरूर तालुक्यातील टाकळी हाजी येथील जागतिक ख्यातीचे रांजणखळगे परीसरात असणारे तीर्थक्षेत्र आणि ग्रामदैवत माता मळगंगा देवीच्या नवरात्रोत्सवाला भाविकांची अलोट गर्दी होत आहे. देवीच्या दर्शनासाठी पुणे, अहिल्यानगरसह राज्यातून भाविक मोठ्या संख्येने दाखल होत आहेत. मंदिर परिसरातील आकर्षक विद्युतरोषणाई, पहाटेची मंगलमय आरती,

अखंड हरिनाम सप्ताह, कीर्तनसेवा, विविध धार्मिक कार्यक्रमांमुळे संपूर्ण देवस्थान परिसर भक्तिरसात न्हाऊन निघाला आहे. श्रद्धा, भक्ती आणि श्रद्धा, भक्ती, निसर्गसौंदर्य आणि धार्मिक परंपरा यांचा सुरेख संगम असलेल्या माता मळगंगा देवीच्या नवरात्रोत्सवामुळे टाकळी हाजी परिसर सध्या भक्तिमय वातावरणाने भारावून गेला असून, देवीच्या दर्शनासाठी भाविकांची गर्दी दिवसेंदिवस लक्षवेधी ठरत आहे.

निसर्गसौंदर्याचा अनोखा संगम अनुभवण्यासाठी भाविकांसह पर्यटकांचीही येथे मोठी गर्दी होत आहे. टाकळी हाजी येथील माता मळगंगा देवी हे हजारो भाविकांचे श्रद्धास्थान आहे. कुकडी नदीच्या पात्रातील प्रसिद्ध रांजणखळगे आणि निसर्गरम्य परिसरामुळे तीर्थक्षेत्राला विशेष महत्त्व प्राप्त झाले आहे.

जागतिक कुंड पर्यटनस्थळ म्हणून ओळख असलेल्या परिसरात नवरात्रोत्सवाच्या निमित्ताने धार्मिक उत्साहाला उधाण आले आहे. मळगंगा देवस्थानातील पहाटे पावणेसहा वाजता होणारी मंगलमय आरती हे नवरात्रोत्सवातील प्रमुख आकर्षण ठरत आहे. पहाटेच्या शांत वातावरणात देवीच्या आरतीचे सूर घुमू लागल्यानंतर परिसरात भक्तिमय वातावरण निर्माण होते. देवीच्या चरणी नतमस्तक होऊन कुटुंबाच्या सुख-समृद्धीसाठी आणि सर्वांच्या कल्याणासाठी प्रार्थना केली जात आहे.

विजयादशमीपर्यंत धार्मिक कार्यक्रम
नवरात्रोत्सवाच्या कालावधीत आरती, हरिपाठ, कीर्तन, जागर, काकडा, महाप्रसाद आदी धार्मिक व सांस्कृतिक कार्यक्रम होत आहेत. विजयादशमीपर्यंत सुरू राहणाऱ्या धार्मिक कार्यक्रमांमुळे देवस्थान परिसरात उत्सवाची रंगत कायम राहणार आहे. मंदिर परिसरातील आकर्षक विद्युतरोषणाई भाविकांचे लक्ष वेधून घेत आहे.