Sushma Andhare : स्टँडअप कॉमेडियन कुणाल कामरा याने व्यंगात्मक गाणे सादर करून उपमुख्यमंत्री एकनाथ शिंदे यांच्यावर अप्रत्यक्ष टीका केली. कॉमेडियनचा हा व्हिडिओ तुफान व्हायरल झाला. त्यानंतर कामराविरुद्ध मुंबईतील काही पोलीस ठाण्यात गुन्हा दाखल करण्यात आला आहे. दुसरीकडे विरोधकांनीही हा व्हिडिओ शेअर करत या टीकेचे समर्थन केले.

शिवसेना उपनेत्या सुषमा अंधारे यांनी पुन्हा एकदा ते गाणं म्हटल्याचा व्हिडिओही समोर आला होता. त्यामुळे कुणाल कामरा व सुषमा अंधारे यांच्याविरुद्ध हक्कभंग प्रस्ताव दाखल करण्यात आला आहे. दरम्यान, चौकशी करून योग्य ती कारवाई केली जाईल, अशी ग्वाही राज्यमंत्री योगेश कदम यांनी परिषदेत दिली. (Sushma Andhare)

एकनाथ शिंदे यांच्यावर व्यंगात्मक गाणे सादर केल्यानंतर शिवसैनिकांनी स्टुडिओची तोडफोड केली. राज्यात त्यानंतर तीव्र पडसाद उमटत आहेत. विधानभवनात देखील यावरून वाद रंगला. शिवसेनेकडून (ठाकरे) कामरा याच्या व्हिडीओची पाठराखण करण्यात आली. उपनेत्या अंधारे यांनी छत्रपती शिवाजी महाराज आणि महापुरुषांविरोधात भाजपच्या नेत्यांनी केलेल्या वादग्रस्त वक्तव्याचा दाखला दिला. (Kunal Kamra,)

स्टुडिओची तोडफोड करणाऱ्या शिवसैनिकांनी माजी राज्यपाल भगतसिंग कोश्यारी, राहुल सोलापूरकर, प्रशांत कोरटकर, तुषार आपटे यांची कार्यालये का तोडली नाहीत, असा सवाल प्रसारमाध्यमांतून विचारला गेला. भाजपचे प्रवीण दरेकर यांनी अंधारे यांच्या विधानाचा दाखला देत, अंधारे आणि कामरा यांच्याविरोधात विधान परिषदेत हक्कभंग मांडला. कामरा आणि अंधारे यांनी शिंदे यांचा उल्लेख केल्याने दोन्ही सभागृहांचा अवमान आणि अपमान केल्याचा आरोप केला. तर शिवसेनेचे सदस्य हेमंत गोडसे यांनी कामरा याचे अर्बन नक्षलवादी उमर खालीद सोबत फोटो प्रसारित झाले आहेत. तरी त्याच्यावर कारवाई करावी, अशी मागणी केली.

सुषमा अंधारेंची प्रतिक्रिया

विधिमंडळाच्या वरिष्ठ सभागृहामध्ये आमदार प्रवीण दरेकर यांनी माझ्यावर हक्कभंग प्रस्ताव आणण्यासंदर्भात निवेदन केल्याचे समजते. मी कोणतं विभत्स कृत्य केलं आहे, मी सभागृहात 56 जण पायाला बांधून फिरते अशी भाषा केली आहे का? मी कोणाचा एकेरी उल्लेख केला आहे का? मी सभागृहाबद्दल कोणाला खोटी माहिती पुरवली आहे का? असा सवाल सुषमा अंधारे यांनी उपस्थित केला.

तसेच, ज्या गृहमंत्र्यांनी सोमनाथ सूर्यवंशी यांच्या मृत्यूप्रकरणी सभागृहात खोटी माहिती दिली, अंतरवालीतील लाठी हल्ल्यासंदर्भात सभागृहाला खोटी माहिती देणारे गृहमंत्री फडणवीस आणि कोकणातील रिफायनरी संदर्भात नागरिकांनी केलेल्या आंदोलनावर पोलिसांनी केलेल्या अत्याचाराची सभागृहात खोटी माहिती देणाऱ्या देवेंद्र फडणवीस यांच्यावर हक्कभंग आणणे शक्य आहे का? याची माहिती मला सभागृहाने द्यावी, असे सुषमा अंधारे यांनी म्हटले आहे. (Sushma andhare)