Satara News: सातारा जिल्ह्यातील ५ तालुके दुष्काळग्रस्त होणार? ना. शंभूराज देसाईंच्या पाठपुराव्याची दखल
Satara News: पाटणसह पाच तालुक्यांचा दुष्काळी क्षेत्रात समावेश करण्यासाठी पालकमंत्री शंभूराज देसाईंचा मुख्यमंत्री-उपमुख्यमंत्र्यांकडे पाठपुरावा; मुख्य सचिवांना तातडीने कार्यवाही करण्याचे निर्देश.
Satara News – पाटणसह वाई, सातारा, जावली आणि कोरेगाव या पाच तालुक्यांचा दुष्काळी क्षेत्रात समावेश करण्यासाठी पालकमंत्री शंभूराज देसाई यांनी मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्याकडे केलेल्या पाठपुरावाची दखल घेत मुख्य सचिवांना आवश्यक कार्यवाही तातडीने करण्याचे निर्देश दिले आहेत.
पाटण तालुक्यातील 14 महसूल मंडळांपैकी नऊ मंडळांत 75 टक्कयांपेक्षा कमी पाऊस झाला आहे. उर्वरित मंडळांत पर्जन्यमान तुलनेने अधिक असले, तरी सप्टेंबरमधील पावसाच्या दीर्घ खंडामुळे खरीप पिकांवर परिणाम झाला आहे. पिके करपण्याच्या स्थितीत असून शेतकर्यांना आर्थिक फटका बसत असल्याचे देसाई यांनी शासनाच्या निदर्शनास आणले.
वाई, सातारा, जावली आणि कोरेगाव तालुक्यांतही पावसाच्या खंडामुळे शेतीचे नुकसान झाले आहे. त्यामुळे केवळ एकूण पर्जन्यमान न पाहता पावसातील खंड आणि पिकांवरील प्रत्यक्ष परिणाम लक्षात घेऊन दुष्काळी निकषांनुसार निर्णय घ्यावा, अशी मागणी देसाई यांनी केली आहे.
सध्या जिल्ह्यातील माण, खटाव, फलटण, खंडाळा आणि महाबळेश्वर या तालुक्यांचा दुष्काळी यादीत समावेश आहे. मात्र, पाटणसह पाच तालुके वगळण्यात आले आहेत. त्यामुळे या तालुक्यांच्या समावेशाबाबत शासनाच्या निर्णयाकडे शेतकरी वर्गाचे लक्ष लागले आहे.
