Varun Tej: टॉलीवुड अभिनेता वरुण तेज आणि त्यांची पत्नी, अभिनेत्री लावण्या त्रिपाठी यांच्या घरी चिमुकल्या बाळाचं आगमन झालं आहे. 10 सप्टेंबर रोजी या दाम्पत्याने आपल्या इन्स्टाग्रामवर पोस्ट शेअर करून मुलगा झाल्याची आनंदवार्ता चाहत्यांना दिली. काही मिनिटांतच ही पोस्ट व्हायरल झाली आणि चाहत्यांसह सिनेसृष्टीतील अनेकांनी शुभेच्छांचा वर्षाव केला.

चिरंजीवींचा भावनिक संदेश

मेगास्टार आणि माजी राजकारणी चिरंजीवी कोनीडेला यांनीही या खास प्रसंगी आपल्या पुतण्या वरुण तेज आणि सुन लावण्याला मनःपूर्वक शुभेच्छा दिल्या. एक्सवर लिहिलेल्या संदेशात ते म्हणाले,
“स्वागत आहे छोट्या ! कोनीडेला कुटुंबात एका गोंडस मुलाचा जन्म झाला. वरुण आणि लावण्याचे अभिमानी पालक झाल्याबद्दल मनःपूर्वक अभिनंदन. नागबाबू आणि पद्मजा आज आजी-आजोबा झाले आहेत, त्यांनाही हार्दिक शुभेच्छा. बाळाला उत्तम आरोग्य, भरपूर आशीर्वाद आणि आनंद लाभो.”

पहिली झलक शेअर केली

याच दिवशी दुपारी वरुण आणि लावण्या यांनी आपल्या मुलाची पहिली झलक इन्स्टाग्रामवर शेअर केली. ब्लॅक अँड व्हाईट फोटोमध्ये लावण्या आपल्या मुलाला उबदारपणे मिठीत धरून होत्या आणि वरुण तेज त्यांना गोडपणे मिठी मारताना दिसले. या फोटोला कॅप्शन देण्यात आलं होतं,
“Our little man. 10.09.2025”

वरुण आणि लावण्याची प्रेमकथा

वरुण तेज आणि लावण्या त्रिपाठी यांची ओळख 2017 मध्ये ‘मिस्टर’ चित्रपटाच्या सेटवर झाली. अनेक वर्षं नातं गुप्त ठेवून त्यांनी 2023 मध्ये जून महिन्यात साखरपुडा केला. त्यानंतर 1 नोव्हेंबर 2023 रोजी इटलीमध्ये सुंदर लग्नसमारंभात विवाहबंधनात अडकले. लग्नानंतर दोघेही सोशल मीडियावर एकत्रित क्षण शेअर करत राहिले. सप्टेंबर 2025 मध्ये त्यांनी गर्भारपणाची बातमी जाहीर केली होती.

चिरंजीवीबद्दल थोडक्यात

चिरंजीवी कोनीडेला हे भारतीय चित्रपटसृष्टीतील दिग्गज नाव आहे. त्यांनी 1978 मध्ये ‘पुनाधिरल्लू’ या चित्रपटातून पदार्पण केलं आणि ‘खैदी’, ‘इंद्रा’, ‘टागोर’ सारखे हिट चित्रपट दिले. त्यांच्या कुटुंबात पत्नी सुरेखा आणि तीन मुले आहेत. दोन मुली सुष्मिता आणि श्रीजा तसेच सुप्रसिद्ध अभिनेता राम चरण. वरुण तेज हे त्यांचे पुतणे आहेत.