Vaishno Devi Yatra : जम्मू-काश्मीरमधील रियासी जिल्ह्यातील माता वैष्णो देवी मंदिराकडे जाणारी यात्रा मंगळवारी (२६ ऑगस्ट) जोरदार पाऊस आणि भूस्खलनामुळे पुढील सूचनेपर्यंत स्थगित करण्यात आली आहे. गेल्या तीन दिवसांपासून सुरू असलेल्या मुसळधार पावसामुळे जम्मू परिसरात मोठ्या प्रमाणात नुकसान झाले आहे. हवामान खात्याने केंद्रशासित प्रदेशासाठी ‘रेड अलर्ट’ जारी केला आहे.

एक अधिकाऱ्याने सांगितले की, सततच्या पावसामुळे आणि खराब हवामानामुळे माता वैष्णो देवी मंदिर मार्गावर भूस्खलन झाले आहे. तीर्थयात्री आणि सामान्य नागरिकांच्या सुरक्षेसाठी हवामानात सुधारणा होईपर्यंत यात्रा स्थगित ठेवण्याचा निर्णय घेण्यात आला आहे. याशिवाय, प्रशासनाने खबरदारीचा उपाय म्हणून अनेक रस्ते बंद केले असून, दोन दिवसांसाठी शाळांनाही सुट्टी जाहीर केली आहे. अचानक पूर आल्याने काही पूल वाहून गेल्याच्या बातम्याही समोर आल्या आहेत.

जम्मू-काश्मीरचे मुख्यमंत्री उमर अब्दुल्ला यांनी मंगळवारी सांगितले की, जम्मूच्या विविध भागांतील परिस्थिती अत्यंत गंभीर आहे. त्यांनी प्रशासनाला हाय अलर्टवर राहण्याचे आणि आवश्यक ती सर्व पावले उचलण्याचे निर्देश दिले. मुख्यमंत्र्यांच्या कार्यालयाने ‘एक्स’वर एका पोस्टमध्ये म्हटले आहे की, अब्दुल्ला यांनी जम्मूमधील पूर नियंत्रण उपायांचा आढावा घेण्यासाठी बैठक घेतली.

जम्मू भागात मंगळवारी सलग तिसऱ्या दिवशी मध्यम ते मुसळधार पाऊस पडला. यामुळे बहुतांश नद्या धोक्याच्या पातळीवर किंवा त्यापेक्षा जास्त वाहत आहेत. परिणामी, शहरातील अनेक खालच्या भागात आणि रस्त्यांवर पाणी साचले आहे. जम्मू-श्रीनगर राष्ट्रीय महामार्गावर वाहनांची वाहतूकही थांबवण्यात आली आहे. मुख्यमंत्र्यांनी आपत्कालीन कामांसाठी आणि इतर गरजांसाठी उपायुक्तांना अतिरिक्त निधी उपलब्ध करून देण्याचे निर्देश दिले आहेत.

दरम्यान, डोडा जिल्ह्यात मुसळधार पावसामुळे चार जणांचा मृत्यू झाला आहे. दोन जणांचा मृत्यू त्यांचे घर कोसळल्याने झाला, तर अन्य दोघांचा अचानक आलेल्या पुरात मृत्यू झाला. दोन ठिकाणी ढगफुटीच्या घटनाही घडल्याची माहिती आहे. जिल्हा प्रशासनाने लोकांना नदीकाठापासून दूर राहण्याचे आणि सतर्क राहण्याचे आवाहन केले आहे.

प्रशासन सतर्क, नागरिकांना सावधगिरी बाळगण्याचे आवाहन
मुख्यमंत्री कार्यालयाने सांगितले की, पूर परिस्थितीवर नियंत्रण ठेवण्यासाठी प्रशासन सज्ज आहे. नागरिकांनी आवश्यक खबरदारी घ्यावी आणि प्रशासनाच्या सूचनांचे पालन करावे, असे आवाहन करण्यात आले आहे.