Vaishnavi Hagavane death case : वैष्णवी हगवणे आत्महत्या प्रकरणात २८ मे रोजी पुण्यातील न्यायालयात सुनावणी पार पडली. यावेळी आरोपींच्या वकिलाने खळबळजनक दावे करत वैष्णवीच्या चारित्र्यावर प्रश्नचिन्ह उपस्थित केले. वैष्णवीचा पती शशांक हगवणे, नणंद करिश्मा हगवणे आणि सासू लता हगवणे यांना एका दिवसाच्या कोठडीची शिक्षा सुनावण्यात आली, तर सासरा राजेंद्र हगवणे आणि दीर सुशील हगवणे यांना ३१ मेपर्यंत पोलीस कोठडीत ठेवण्याचे आदेश न्यायालयाने दिले. आरोपींच्या वकिलाने हगवणे कुटुंबाचा बचावासाठी कोर्टात वैष्णवीच्या चारित्र्यावर शिंतोडे उडवले. वैष्णवीने नको त्या व्यक्तीसोबत चॅट करायची तिचे चॅट पकडले होते. त्या व्यक्तीने नकार दिल्यानेच वैष्णवीने आत्महत्या केली आहे. १८ तारखेला त्या मुलाचा साखरपुडा झाला, त्यामुळे ती कॉल करत होती. तपास अधिकाऱ्याला त्या व्यक्तीचे नाव दिले आहे, असा खळबळजनक दावा हगवणे यांच्या वकिलांनी न्यायलयात केला आहे. यामुळे हे प्रकरण आता वेगळ्या वळणावर गेले आहे. नेमकं काय म्हणाले वकील? काल २८ मे रोजी पुण्यातील कोर्टात महाराष्ट्रभर चर्चेत असलेले वैष्णवी हगवणे आत्महत्या प्रकरणाची सुनावणी पार पडली. या प्रकरणात हगवणे यांच्या वकिलांनी न्यायालयात अनेक खळबजक दावे केले. वैष्णवीची प्रवृत्ती सुसाईट करण्याचीच होती. असे म्हणत ज्या माणसासोबत ती चॅट करत होती त्याने नकार दिला असेल, म्हणून ती नैराश्यात असेल म्हणून तिने आत्महत्या केली आहे, असा दावा केला आहे. दोन दिवसांनी त्या तरुणाचा साखरपुडा झाला : वैष्णवी यांनी एका तरुणाशी केलेले चॅटिंग पती शशांक यांना मिळाले होते. यावरून दोघांमध्ये वाद देखील झाला होता. ही बाब हगवणे यांनी वैष्णवीच्या यांच्या कुटुंबीयांच्या लक्षात आणून दिली होती. त्यानंतर कस्पटे कुटुंबीयांनी वैष्णवी यांचा मोबाईल काढून घेतला होता, असा युक्तिवाद वकिलाने न्यायालयात केला. वैष्णवी यांनी आत्महत्या केल्यानंतर दोन दिवसांनी त्या तरुणाचा साखरपुडा झाला आहे. या प्रकरणात पोलिस एकाच दिशेने तपास करत आहेत, असे देखील वकिल म्हणाले. दरम्यान, आता या घटनेवर स्वतः वैष्णवीचे वडील अनिल कस्पटे यांनी भाष्य केलं आहे. यावेळी त्यांनी हगवणेंच्या दाव्यांची चिरफाड केली. त्यांनी हगवणे कुटुंबाकडे पाच कोटींच्या कार नाही हे देखील अनिल कस्पटे यांनी सांगितलंय. यावेळी बोलताना अनिल कस्पटे म्हणाले की, ‘आम्ही वैष्णवीचा छळ केला नाही, असं ते म्हणत आहेत. गाडीसाठी तिचा छळ केला नाही, असंही ते सांगत आहेत. हे सांगतानाच ते आमच्याकडे 5 कोटींच्या गाड्या आहेत, असंही ते सांगत आहेत. मी एमजे हेक्टर गाडी बुक केली होती. फॉर्च्युनर गाडी घेण्याच्या अगोदर मी वाकडच्या शोरुमला ही गाडी बुक केली होती. त्यासाठी 50 हजार रुपये डिपॉझिट केले होते. त्याची पावती माझ्याकडे आहे, असा खुलासा अनिल कस्पटे यांनी केला. मी त्या गाडीला तिथेच पेटवून देईन : तसेच पुढे बोलताना शशांक हगवणे यांनी माझ्याशी वाद घातला. मला एमजे हेक्टर गाडी दिली तर मी ती घेणार नाही. त्या गाडीला तिथेच पेटवून देईन, असं शशांक हगवणे मला म्हणाला होता. मला फक्त फॉर्च्युनर गाडीच पाहिजे, असं तो म्हणत होता. त्यानंतर मी लग्नात फॉर्च्युनर गाडी दिली, असा खुलास अनिल कस्पटे यांनी दिला. आमच्याकडे पाच कोटींच्या गाड्या आहेत, असा दावा हगवणे कुटंबीय करत आहे. पण त्यांच्याकडे एकच गाडी आहे. त्यांच्याकडे पाच गाड्या नाहीत. त्यांच्याकडे निव्वळ आणि निव्वळ फोर्ड गाडी आहे. ती गाडी बुचडे नावाच्या इसमाची गाडी आहे. चंद्रकांत बुचडे नावाच्या व्यक्तीच्या नावावर ही गाडी आहे. ती गाडी पोलीस ठाण्यात लावलेली आहे. म्हणजेच त्यांच्याकडे एकही गाडी आहे, असाही खुलासा त्यांनी केला. अगोदरच माझ्या मुलीची दोन लग्न मोडली : मी दिलेली फॉर्च्युनर गाडी ही स्वखुशीने दिलेली नाही. तर मला ती गाडी मागण्यात आलेली आहे. मी लग्नाला उभं राहणार नाही. लग्न मोडून टाकेन अशी धमकी ते देत होते. अगोदरच माझ्या मुलीची दोन लग्न मोडली. त्यातही मला हे लग्न जबरदस्तीने करावं लागलं. माझ्याकडे सोन्याची, चांदीची, गाडीची मागणी केली, असा धक्कादायक आरोप त्यांनी केला.
