Vaibhav Sooryavanshi World Record as Youngest Fifty  : भारत आणि झिम्बाब्वे यांच्यातील टी-२० मालिकेतील पहिला सामना २३ जुलै रोजी हरारे येथे पार पडला. कर्णधार श्रेयस अय्यरने नाणेफेक जिंकून प्रथम गोलंदाजीचा निर्णय घेतला होता. झिम्बाब्वेला २० षटकांत ७ बाद १२५ धावांवर रोखल्यानंतर भारतीय फलंदाजांनी आक्रमक सुरुवात केली. अभिषेक शर्मा १ धाव काढून लवकर बाद झाला, मात्र १५ वर्षीय युवा फलंदाज वैभव सूर्यवंशीने (Vaibhav Sooryavanshi) मैदानावर चौफेर फटकेबाजी करत आंतरराष्ट्रीय क्रिकेटच्या इतिहासातील सर्वात युवा फलंदाज म्हणून अर्धशतक झळकावण्याचा महाविक्रम रचला.

सचिन तेंडुलकर अन् कुशल मल्लाचा वर्ल्ड रेकॉर्ड उद्ध्वस्त –

आपल्या चौथ्या टी-२० सामन्यात वैभवने हे पहिले वहिले आंतरराष्ट्रीय अर्धशतक ठोकले. १५ वर्षे आणि ११८ दिवस वय असणाऱ्या वैभवने आंतरराष्ट्रीय क्रिकेटमध्ये (सर्व फॉरमॅट मिळून) अर्धशतक ठोकणारा जगातील सर्वात तरुण फलंदाज बनण्याचा बहुमान मिळवला. त्याने नेपाळच्या कुशल मल्लाचा (१५ वर्षे ३४० दिवस) जागतिक विक्रम मोडीत काढला. याशिवाय, त्याने भारताचा महान फलंदाज सचिन तेंडुलकरचा (१६ वर्षे २१३ दिवस) ३७ वर्षे जुना भारतीय विक्रमही मागे टाकला.

टी२० आंतरराष्ट्रीय क्रिकेटमध्ये अर्धशतक झळकावणारे सर्वात तरुण फलंदाज:

• वैभव सूर्यवंशी (भारत) – १५ वर्षे आणि ११८ दिवस
• लुईस ब्रूस (जिब्राल्टर) – १५ वर्षे आणि ५६ दिवस
• केविन चड्ढा (इंडोनेशिया) – १५ वर्षे आणि ७६ दिवस

हेही वाचा – Mayank Yadav Record : २ वर्षांनंतर पुनरागमन अन् पहिल्याच बॉलवर थेट विकेट! मयंक यादवने हरारेत रचला नवा इतिहास

१८ चेंडूंत वादळी अर्धशतक अन् टीकाकारांची बोलती बंद –

इंग्लंड दौऱ्यात १४, १३ आणि १५ धावांवर बाद झाल्यामुळे वैभववर चहूबाजूंनी टीका होत होती. मात्र, हरारेच्या मैदानावर वैभवने अवघ्या १८ चेंडूंत ४ चौकार आणि ४ उत्तुंग षटकारांच्या मदतीने आपले अर्धशतक पूर्ण केले. पुढील चेंडूवर मोठा फटका मारण्याच्या प्रयत्नात रिचर्ड नगारवाच्या चेंडूवर तो झेलबाद झाला. त्याची ही १९ चेंडूंतील ऐतिहासिक खेळी भारताच्या विजयाचा पाया रचणारी ठरली. यासह कर्णधार श्रेयस अय्यरच्या नेतृत्त्वाखाली टीम इंडियाने पहिला टी-२० सामना जिंकला आहे. याआधी सलग सामन्यात पराभव पत्करावा लागला होता.