Vaibhav Sooryavanshi Net Practice Video Shreyas Iyer Statement IND vs ENG 1st T20I : भारतीय क्रिकेटचा नवा उगवता तारा आणि अवघ्या १५ वर्षांचा तुफानी फलंदाज वैभव सूर्यवंशी सध्या इंग्लंड दौऱ्यावर आपल्या फलंदाजीने सर्वांना थक्क करत आहे. आंतरराष्ट्रीय क्रिकेटमध्ये वैभवचे पदार्पण कधी होणार? या प्रश्नाचे उत्तर अजून मिळाले नसले, तरी या डावखुऱ्या फलंदाजाने सरावादरम्यान आपल्या बॅटने निवडकर्त्यांना चोख उत्तर दिले आहे. इंग्लंडविरुद्ध चेस्टर-ले-स्ट्रीट येथे होणाऱ्या पहिल्या टी-२० सामन्यापूर्वी वैभवने नेट्समध्ये तासनतास सराव करताना तुफान फटकेबाजी केली. त्याच्या या फटकेबाजीचा व्हिडीओ सध्या सोशल मीडियावर प्रचंड व्हायरल होत आहे.

भारतीय गोलंदाजांची केली धुलाई; व्हिडीओ व्हायरल –

नेट्समध्ये सराव करताना वैभव सूर्यवंशीने भारतीय गोलंदाज आणि थ्रो-डाऊन तज्ज्ञांचा खरपूस समाचार घेतला. सुरुवातीला त्याने काही जमिनीलगतचे शॉट्स खेळले, पण एकदा का हात स्थिरावल्यावर त्याने थेट हवाई हल्ले चढवण्यास सुरुवात केली. ‘स्टार स्पोर्ट्स’ने सोशल मीडियावर त्याचा २२ सेकंदांचा एक व्हिडीओ शेअर केला आहे, ज्यामध्ये तो अप्रतिम लयमध्ये दिसत आहे. हा व्हिडीओ पाहिल्यानंतर चाहत्यांकडून त्याला लवकरात लवकर प्लेइंग इलेव्हनमध्ये सामील करण्याची मागणी जोर धरू लागली आहे.

Dancing down the track and launching them big! 🚀#VaibhavSooryavanshi in supreme touch ahead of #ENGvIND 1st T20I 🫡

Is today the day we see the prodigy make history on his senior India debut? 🇮🇳✨#ENGvIND 👉 1st T20I | WED, 1st JULY, 𝟗 𝐏𝐌 on JioHotstar pic.twitter.com/6Yr5zuCIpM

— Star Sports (@StarSportsIndia) July 1, 2026

कर्णधार श्रेयस अय्यरने दिले मोठे संकेत –

वैभव सूर्यवंशीच्या पदार्पणाची उत्सुकता सर्वांनाच लागली आहे. आयर्लंडविरुद्धच्या टी-२० मालिकेत त्याला एकही सामना खेळायला मिळाला नव्हता. आता इंग्लंडविरुद्धच्या ५ सामन्यांच्या मालिकेत त्याला संधी मिळणार का, हा मोठा प्रश्न आहे. याबाबत कर्णधार श्रेयस अय्यरने स्पष्ट केले आहे की, आयर्लंडविरुद्ध पराभूत झालेल्या प्लेइंग इलेव्हनमध्ये तो लगेच बदल करणार नाही. अय्यरच्या मते, ज्या खेळाडूंनी भारताला टी-२० वर्ल्ड कप जिंकवून दिला आहे, त्यांचा आत्मविश्वास कायम ठेवण्यासाठी त्यांना सलग संधी देणे आवश्यक आहे. तरीही, ५ सामन्यांची ही मोठी मालिका असल्याने वैभवला किमान एका सामन्यात तरी संधी मिळेल, अशी आशा आहे.

हेही वाचा – Hardik Pandya : हार्दिक पांड्याने सोडली मुंबई; करिअरसाठी घेतला सर्वात मोठा निर्णय

आयपीएल २०२६ मधील भयंकर आकडेवारी –

वैभव सूर्यवंशी सध्या कारकिर्दीतील सर्वोत्तम फॉर्ममध्ये आहे. आयपीएल २०२६ मध्ये त्याने सर्वाधिक ७७६ धावा ठोकल्या होत्या. विशेष म्हणजे, या १५ वर्षांच्या मुलाने स्पर्धेत सर्वाधिक ७२ षटकार ठोकले आणि त्याचा स्ट्राईक रेट २३७.३० चा होता. त्यानंतर ‘इंडिया ए’ कडून खेळताना श्रीलंकेतील तिरंगी मालिकेच्या अंतिम सामन्यात त्याने अवघ्या २९ चेंडूंत ९४ धावांची वादळी खेळी करत संघाला विजेतेपद मिळवून दिले होते