Uddhav Thackeray : राज्याच्या राजकारणात मोठी घडामोड घडली आहे. उपमुख्यमंत्री एकनाथ शिंदे यांनी उद्धव ठाकरे यांना राजकीय धक्का दिला आहे. जळगावमधील बडे नेते आणि माजी खासदार उन्मेष पाटील यांनी शिवसेना (ठाकरे गट) ला रामराम ठोकत शिंदे गटात प्रवेश करण्याचा निर्णय घेतला आहे. ६ मार्च रोजी मुंबईत त्यांचा अधिकृत पक्षप्रवेश सोहळा पार पडणार असून ते शिंदे गटाचा ‘धनुष्यबाण’ हाती घेणार आहेत. भाजपपासून ठाकरे गटापर्यंतचा प्रवास उन्मेष पाटील यांनी २०२४ च्या लोकसभा निवडणुकीवेळी भाजपने तिकीट नाकारल्यामुळे नाराजी व्यक्त केली होती. त्यानंतर त्यांनी भाजपला सोडचिठ्ठी देत शिवसेना (उद्धव बाळासाहेब ठाकरे गट) मध्ये प्रवेश केला होता. २०२४ च्या विधानसभा निवडणुकीत त्यांनी ठाकरे गटाकडून निवडणूक लढवली. मात्र त्यांना पराभवाचा सामना करावा लागला. आता त्यांनी पुन्हा एकदा राजकीय कलाटणी घेत शिवसेना (शिंदे गट) मध्ये जाण्याचा निर्णय घेतला आहे. शिंदे गटात शक्तीप्रदर्शन ६ मार्च रोजी खासदार श्रीकांत शिंदे यांच्या उपस्थितीत मुंबईत उन्मेष पाटील यांचा पक्षप्रवेश होणार आहे. या वेळी मोठे शक्तीप्रदर्शन करण्याची तयारी सुरू असल्याची माहिती आहे. सोमवारी त्यांनी पालकमंत्री गुलाबराव पाटील यांची भेट घेत पक्षप्रवेशाबाबत चर्चा केली होती. त्यानंतर दिल्लीमध्ये श्रीकांत शिंदे यांची भेट घेऊन प्रवेशावर शिक्कामोर्तब करण्यात आले. जळगाव-चाळीसगावमध्ये समीकरणे बदलणार? उन्मेष पाटील यांच्या प्रवेशामुळे जळगाव आणि चाळीसगाव परिसरात शिंदे गटाची ताकद वाढणार असल्याचे मानले जात आहे. दरम्यान, छत्रपती संभाजीनगर येथील बँकेकडून त्यांच्या मालमत्तेवर जप्तीची कारवाई सुरू झाल्यानंतर त्यांनी शिंदे गटात प्रवेश करण्याचा निर्णय घेतल्याची चर्चा राजकीय वर्तुळात रंगली आहे. या घडामोडीमुळे राज्यातील राजकीय समीकरणांमध्ये पुन्हा एकदा बदल होण्याची चिन्हे दिसत आहेत.