मुंबई – जोगेश्वरी पूर्वेला बांधकाम सुरू असलेल्या बिल्डिंगमधून सिमेंट वीट खाली पडून २२ वर्षीय तरुणीचा जागीच मृत्यू झाला आहे. संस्कृती अमिन असे तरूणीचे नाव आहे. मजासवाडी परिसरात सकाळी ९.३० च्या सुमारास कामासाठी जात असताना तिच्या डोक्यावर सिमेंट ब्लॉक पडला. त्यानंतर स्थानिकांनी धावाधाव करत तिला रिक्षातून रुग्णालयात नेले, मात्र मोठा रक्तस्त्राव झाल्याने तरुणीचा जागीच मृत्यू झाला होता. घटनेची माहिती मिळतच मेघवाडी पोलिसांनी घटनास्थळी धाव घेत मुलीचे शवविच्छेदन करण्यासाठी पार्थिव रुग्णालयात पाठवले आहे. दरम्यान, घटना कशामुळे घडली, यामध्ये चूक कोणाची आहे, या संदर्भात मेघवाडी पोलिसांनी गुन्हा दाखल करून पुढील तपास सुरू केला आहे.
