Under 19 Asia Cup 2026 India Squad Announced : ओमानमधील मस्कत येथे ५ ते १४ नोव्हेंबर दरम्यान रंगणाऱ्या १९ वर्षांखालील (Under-19) आशिया चषक स्पर्धेसाठी बीसीसीआयने भारतीय संघाची अधिकृत घोषणा केली आहे. या स्पर्धेत भारतीय युवा संघाच्या कर्णधारपदाची धुरा लक्ष्य रायचंदानी याच्याकडे सोपवण्यात आली आहे. विशेष म्हणजे भारताचे माजी दिग्गज फलंदाज वीरेंद्र सेहवाग आणि राहुल द्रविड यांची मुले अनुक्रमे आर्यवीर सेहवाग आणि अन्वय द्रविड यांना संघात स्थान मिळाले आहे. आठ संघांच्या या स्पर्धेत भारताचा समावेश अ गटात करण्यात आला असून, त्यात नेपाळ, पाकिस्तान आणि युएईचे संघ आहेत.

दिवाळीच्या दिवशी रंगणार भारत-पाकिस्तान हाय-व्होल्टेज सामना –

एकदिवसीय फॉरमॅटमध्ये खेळवल्या जाणाऱ्या या स्पर्धेत भारताचा पहिला सामना ६ नोव्हेंबर रोजी नेपाळविरुद्ध होईल. त्यानंतर सर्वांचे लक्ष लागलेला भारत-पाकिस्तान महामुकाबला ८ नोव्हेंबर रोजी दिवाळीच्या दिवशी पार पडणार आहे. साखळी फेरीतील शेवटचा सामना १० नोव्हेंबरला युएईविरुद्ध खेळवला जाईल. गटातील अव्वल दोन संघ १२ नोव्हेंबरला होणाऱ्या उपांत्य फेरीत प्रवेश करतील, तर १४ नोव्हेंबर रोजी अंतिम सामना खेळवला जाईल. सर्व सामने भारतीय वेळेनुसार सकाळी १०:३० वाजता सुरू होतील.

आर्यवीर सेहवाग आणि अन्वय द्रविडची कामगिरी –

संघात निवड झालेल्या दोन्ही स्टार पुत्रांची यूथ वनडे क्रिकेटमधील आकडेवारी समाधानकारक राहिली आहे. आर्यवीर सेहवागने आतापर्यंत खेळलेल्या ३ यूथ वनडे सामन्यांत ३६.३३ च्या सरासरीने १०९ धावा केल्या असून, त्याची सर्वोच्च धावसंख्या ४७ आहे. दुसरीकडे, यष्टिरक्षक फलंदाज अन्वय द्रविडने ४ यूथ वनडे सामन्यांत ३७ च्या सरासरीने १४८ धावा जमवल्या असून त्याच्या खात्यावर एका अर्धशतकाची नोंद आहे.

India announce their squad for the U19 Asia Cup 2026, with Aaryavir Sehwag and Anvay Dravid earning places in the squad 🇮🇳

#India #AsiaCup2026 #AaryavirSehwag https://t.co/lejkBoWPoI

— CricTracker (@Cricketracker) October 30, 2026

वडिलांचा वारसा पुढे नेण्याचे मोठे आव्हान –

वीरेंद्र सेहवागची आक्रमक फटकेबाजी आणि राहुल द्रविडचा संयमी क्लास भारतीय क्रिकेटच्या इतिहासात अजरामर आहे. आता या दोघांचे सुपुत्र एकाच वेळी भारतीय जर्सी घालून मैदानात उतरणार असल्याने जगभरातील क्रिकेट रसिकांच्या नजरा त्यांच्या खेळाकडे लागल्या आहेत. आशिया चषकासारख्या मोठ्या व्यासपीठावर आपल्या वडिलांचा वारसा पुढे नेत हे दोघे टीम इंडियाला चॅम्पियन बनवणार का, हे पाहणे औत्सुक्याचे ठरेल.

हेही वाचा – Pakistan Beat India : अवघ्या २३ चेंडूंत भारताचा खेळ खल्लास! पाकिस्तानने ६ विकेट्सने लोळवले; तेवतिया-कृणाल शून्यावर बाद

आशिया चषकासाठी भारतीय अंडर-१९ संघ:

लक्ष्य रायचंदानी (कर्णधार), यशवर्धन सिंह चौहान (उपकर्णधार), आर्यवीर सेहवाग, व्ही.के. विनीत, कुशाग्र ओझा, अर्जुन राजपूत, मनाल चौहान, अन्वय द्रविड (यष्टिरक्षक), रजत बघेल (यष्टिरक्षक), व्ही. यशवीर, आर्यन सवसानी, मोहित उलवा, काव्या पटेल, शाविन विनोद, ईशान सूद.