Rohit Sharma Set to Return as Mumbai Indians Captain in IPL 2027 : आयपीएल २०२७ च्या आगामी हंगामापूर्वी पाच वेळच्या चॅम्पियन मुंबई इंडियन्स (MI) संघातून सर्वात मोठी आणि खळबळजनक बातमी समोर आली आहे. दिग्गज फलंदाज रोहित शर्मा पुन्हा एकदा मुंबई इंडियन्सचे कर्णधारपद सांभाळणार यावर आता जवळपास शिक्कामोर्तब झाले आहे. आयपीएल २०२४ पूर्वी रोहितकडून अचानक कर्णधारपद काढून हार्दिक पंड्याकडे सोपवण्यात आले होते. मात्र, सलग तीन हंगाम संघाची कामगिरी अत्यंत निराशाजनक राहिल्याने अखेर फ्रँचायझीने हार्दिकवरील विश्वास गमावला असून, तीन वर्षांनंतर पुन्हा एकदा ‘हिटमॅन’वरच विश्वास दाखवला आहे.

रोहितने सुचवले होते तिलक वर्माचे नाव; पण फ्रँचायझीची विनंती

‘द इंडियन एक्स्प्रेस’चे वरिष्ठ क्रीडा पत्रकार देवेंद्र पांडे यांनी दिलेल्या वृत्तानुसार, जेव्हा फ्रँचायझीने नव्या कर्णधाराबाबत रोहितचा सल्ला मागितला, तेव्हा सुरुवातीला रोहितने युवा फलंदाज तिलक वर्माचे नाव पुढे केले होते. मात्र, संघ एका कठीण स्थितीतून जात असल्याने व्यवस्थापनाने रोहितलाच पुन्हा धुरा सांभाळण्याची कळकळीची विनंती केली, जी रोहितने अखेर मान्य केली. न्यूझीलंड दौऱ्यावर जाण्यापूर्वी याबाबत अनेक बैठका पार पडल्या असून, नव्या प्रशिक्षकांच्या निवडीवेळीही रोहितचे महत्त्वपूर्ण सल्ले घेण्यात आले होते.

१० वर्षांत मिळवून दिली ५ आयपीएल जेतेपदे –

🚨 ROHIT AGREED TO BECOME MI CAPTAIN. 🚨

– Rohit Sharma initially suggested Tilak Varma’s name for the Mumbai Indians captaincy, but MI requested Rohit to lead again and he has agreed. (Express Sports). https://t.co/IfOubDQ0fp

— Mufaddal Vohra (@mufaddal_vohra) October 30, 2026

रोहित शर्माने २०१३ मध्ये जेव्हा पहिल्यांदा मुंबईचे नेतृत्व स्वीकारले, तेव्हा संघाच्या नावावर एकही आयपीएल ट्रॉफी नव्हती. मात्र, रोहितने पहिल्याच प्रयत्नात संघाला चॅम्पियन बनवून दाखवले. २०१३ ते २०२३ या आपल्या १० वर्षांच्या प्रदीर्घ कर्णधारपदाच्या कारकिर्दीत रोहितने २०१३, २०१५, २०१७, २०१९ आणि २०२० अशा तब्बल पाच वेळेस मुंबई इंडियन्सला आयपीएलचे विजेतेपद मिळवून दिले. तो आयपीएलच्या इतिहासातील सर्वात यशस्वी कर्णधारांपैकी एक ठरला.

हार्दिकची ३ वर्षे अपयशी; जेतेपदाचा दुष्काळ संपवण्याचे आव्हान

🚨 CAPTAIN ROHIT SHARMA IS COMING BACK 🔥

– Rohit Sharma is likely to lead Mumbai Indians in IPL 2027. [Devendra Pandey] https://t.co/eq6Q3rMcM8

— Johns. (@CricCrazyJohns) October 30, 2026

२०२० नंतर मुंबईची कामगिरी खालावली आणि रोहितच्या नेतृत्वाखाली संघ तीन वर्षे ट्रॉफी जिंकू शकला नाही. त्यानंतर बदलाची गरज ओळखून पंड्याकडे कमान सोपवण्यात आली. परंतु, हार्दिकच्या तीन वर्षांच्या कार्यकाळातही संघाच्या निकालात कोणताही फरक पडला नाही आणि मुंबईचा संघ प्ले-ऑफच्या शर्यतीतही मागे पडत गेला. परिणामी, गेल्या ६ वर्षांपासून मुंबई इंडियन्सला एकाही आयपीएल जेतेपदाचा आनंद घेता आलेला नाही.

हेही वाचा – Glenn Phillips Century : ग्लेन फिलिप्सचे वादळी शतक; भारताच्या गोलंदाजांची उडवली दाणादाण, रचला मोठा ऐतिहासिक विक्रम

३९ व्या वर्षी रोहित शर्मा चमत्कार करणार का?

सध्या ३९ वर्षांहून अधिक वय असलेला रोहित शर्मा पुन्हा कर्णधारपदाची धुरा हाती घेणार असल्याने चाहत्यांच्या आशा पल्लवित झाल्या आहेत. टी-२० विश्वचषक जिंकणारा सूर्यकुमार यादव किंवा इतर युवा चेहऱ्यांऐवजी संघ व्यवस्थापनाने पुन्हा अनुभवी रोहितवरच डाव लावला आहे. आता ६ वर्षांपासून जेतेपदासाठी तळमळणाऱ्या मुंबई इंडियन्सला रोहित पुन्हा एकदा चॅम्पियन बनवणार का, याकडे संपूर्ण क्रिकेट विश्वाचे लक्ष लागले आहे.