लंडन –  ब्रिटनमध्ये सुरू असलेल्या राजकीय संकटाच्या पार्श्वभूमीवर पंतप्रधान बोरिस जॉन्सन यांनी राजीनामा देण्याचे मान्य केले आहे. ते आज आपल्या पदाचा राजीनामा देऊ शकतात. मात्र, नवीन पंतप्रधान निवडून येईपर्यंत ते या पदावर राहतील.

यापूर्वी ब्रिटिश मीडिया स्काय न्यूजने जॉन्सन यांनी आपल्या पदाचा राजीनामा दिल्याचा दावा केला होता. बीबीसीच्या रिपोर्टनुसार जॉन्सन यांनी आज राजीनामा दिला तरी ते ऑक्टोबरपर्यंत पंतप्रधान राहतील. कारण, ऑक्टोबरमध्ये होणाऱ्या पक्षाच्या परिषदेत नव्या पंतप्रधानाची निवड होणार आहे.

बोरिस जॉन्सन यांच्या विरोधात त्यांच्याच कंझर्व्हेटिव्ह पक्षात बंडखोरी झाली. आतापर्यंत 41 मंत्र्यांनी राजीनामे दिले आहेत. तेव्हापासून त्यांच्यावर राजीनामा देण्याचा दबाव वाढला होता. विरोधी मजूर पक्षही त्यांच्या राजीनाम्याची मागणी करत होता.

अर्थमंत्री ऋषी सुनक यांच्या राजीनाम्याने बोरिस जॉन्सन यांच्या खुर्चीवरील संकटाला सुरुवात झाली. 5 जुलै रोजी त्यांनी आपल्या पदाचा राजीनामा दिला. त्यानंतर काही वेळातच आरोग्य मंत्री साजिद जाविद यांनीही राजीनामा दिला. आतापर्यंत चार कॅबिनेट मंत्र्यांनी राजीनामे दिले आहेत. यामध्ये ऋषी सुनक आणि साजिद जाविद यांच्याशिवाय सायमन हार्ट आणि ब्रँडन लुईस यांनीही राजीनामा दिला आहे.