Tukaram Mundhe : मुख्यमंत्री होण्याची इच्छा आहे का? पुण्यात तुकाराम मुंढेंना सवाल; म्हणाले, ‘हा केवळ विश लिस्टचा भाग’
Tukaram Mundhe : कडक शिस्त, स्पष्टवक्तेपणा आणि धडाकेबाज कार्यपद्धतीमुळे ओळखले जाणारे अन्न व औषध प्रशासनाचे (FDA) आयुक्त तुकाराम मुंढे यांनी मुख्यमंत्री होण्याच्या इच्छेबाबत महत्त्वाची प्रतिक्रिया दिली आहे.

Tukaram Mundhe : कडक शिस्त, स्पष्टवक्तेपणा आणि कामाच्या पद्धतीमुळे चर्चेत असणारे अन्न व औषध प्रशासनाचे आयुक्त तुकाराम मुंढे यांनी मुख्यमंत्री होण्याच्या इच्छेबाबत महत्त्वपूर्ण प्रतिक्रिया दिली आहे. पुण्यातील एफसी कॉलेजच्या मैदानावर आयोजित यूथ फेस्टिव्हलमध्ये युवक-युवतींना मार्गदर्शन केल्यानंतर पत्रकारांनी त्यांना मुख्यमंत्री होण्याची इच्छा आहे का, असा प्रश्न विचारला. त्यावर, “मुख्यमंत्री होण्याची इच्छा ही केवळ विश लिस्टचा भाग आहे. मी विश लिस्टमध्ये राहत नाही, तर वास्तवात जगतो,” असे उत्तर मुंढे यांनी दिले. (Tukaram Mundhe)
‘मी लोकसेवक आहे, वास्तवात जगतो’
एफसी कॉलेजच्या मैदानावर सुरू असलेल्या यूथ फेस्टिव्हलमध्ये तुकाराम मुंढे यांचे विशेष व्याख्यान आयोजित करण्यात आले होते. त्यांच्या मार्गदर्शनासाठी मोठ्या संख्येने युवक-युवती उपस्थित होते. व्याख्यानानंतर त्यांनी माध्यमांशी संवाद साधला. (Tukaram Mundhe)
मुख्यमंत्री होण्याच्या इच्छेबाबत विचारले असता मुंढे म्हणाले की, मुख्यमंत्री होण्याची इच्छा ही केवळ विश लिस्टचा भाग आहे. मात्र, आपण विश लिस्टमध्ये न राहता वास्तवात जगतो. मी एक लोकसेवक असून केवळ नोकरीपुरते मर्यादित न राहता आपली भूमिका समजून ती जगण्याचा प्रयत्न करतो, असेही त्यांनी स्पष्ट केले. प्रत्येक व्यक्तीचा स्वाभिमान आणि प्रतिष्ठा जपणे, हीच आपल्या जीवनाची व्याख्या असल्याचेही मुंढे यांनी सांगितले. (Tukaram Mundhe)
अन्न-औषधांच्या तपासणी अहवालांचा कालावधी कमी होणार
अन्न व औषध प्रशासनाच्या आयुक्तपदाची जबाबदारी स्वीकारल्यानंतर राज्यभरात सुरू असलेल्या कारवाईबाबतही मुंढे यांनी माहिती दिली. तपासणीचे अहवाल मिळण्याच्या कालावधीत गेल्या काही महिन्यांत सुधारणा झाली असल्याचे त्यांनी सांगितले. (Tukaram Mundhe)
पूर्वी अहवाल मिळण्यासाठी ३० दिवसांपासून सहा महिन्यांपर्यंत वेळ लागत होता. आता हा कालावधी कमी होऊन सुमारे २० दिवसांवर आला आहे. आगामी काळात तो १४ दिवसांपर्यंत आणण्याचे उद्दिष्ट असल्याचे मुंढे यांनी स्पष्ट केले. यासाठी आवश्यक मनुष्यबळ आणि साधनसामग्री उपलब्ध करून देण्यासह शिफ्टमध्ये काम सुरू असल्याची माहितीही त्यांनी दिली. (Tukaram Mundhe)
हेल्थ सप्लिमेंटच्या जाहिरातींवर मुंढेंचा इशारा
हेल्थ सप्लिमेंटच्या जाहिरातींमधून केल्या जाणाऱ्या दाव्यांवरही तुकाराम मुंढे यांनी आक्षेप घेतला. काही उत्पादनांच्या जाहिरातींमध्ये सप्लिमेंटचे सेवन केल्याने मसल्स वाढतील, असे दावे केले जातात. मात्र, अशा दाव्यांना कायदेशीर मान्यता नसल्याचे त्यांनी सांगितले. (Tukaram Mundhe)
उत्पादक, विक्रेते किंवा इतर संबंधित व्यक्तींनी नियमबाह्य दावे करू नयेत. चुकीच्या जाहिराती किंवा दिशाभूल करणारे दावे आढळल्यास संबंधितांवर कारवाई केली जाईल, असा इशारा त्यांनी दिला. (Tukaram Mundhe)
जिम चालकांनाही नियमांचे पालन बंधनकारक
जिममध्ये हेल्थ सप्लिमेंट किंवा प्रोटीन उत्पादनांची विक्री करणाऱ्यांनाही नियमांचे पालन करावे लागेल, असे मुंढे यांनी स्पष्ट केले. विक्रीसाठी आवश्यक परवाने घेणे बंधनकारक आहे. मात्र, केवळ परवाना असल्याने कोणतेही उत्पादन विकण्याची मुभा मिळत नाही. (Tukaram Mundhe)
उत्पादन योग्य आहे की नाही, त्याचे लेबल आणि त्यावरील दावे नियमांनुसार आहेत की नाहीत, याची जबाबदारी विक्रेत्यांचीही आहे. उत्पादकाने दिले म्हणून आम्ही विकतो, अशी भूमिका घेऊन जबाबदारी टाळता येणार नाही, असे त्यांनी सांगितले. (Tukaram Mundhe)
चुकीचा ब्रँड, चुकीचे लेबल, दिशाभूल करणारे दावे किंवा सोशल मीडिया इन्फ्लुएन्सर्सकडून होणारी नियमबाह्य जाहिरात आढळल्यास संबंधितांवर कायद्यानुसार कारवाई केली जाईल, असा इशाराही तुकाराम मुंढे यांनी दिला. (Tukaram Mundhe)





