Sanjay Gaikwad | uddhav thackeray | Devendra Fadnavis | शिवसेनेचे बुलढाण्याचे आमदार संजय गायकवाड यांनी आमदार निवासातील कँन्टीन कर्मचाऱ्याला मारहाण केल्याची घटना घडली आहे. सध्या या घटनेचा व्हिडिओ सोशल मीडियावर तुफान व्हायरल होत आहे. ज्यात संजय गायकवाड हे कँन्टीन कर्मचाऱ्याला बुक्क्यांनी मारहाण करत असल्याचे पाहायला मिळत आहे. आमदार निवासातील कँटिनमधील जे जेवण देण्यात आले, ते खराब असल्याचे गायकवाड यांचे म्हणणे आहे. जेवण खराब असल्याच्या मुद्द्यावरून आमदार गायकवाड कँटिनमध्ये गेले आणि तिथल्या कर्मचाऱ्याला जाब विचारला. तसेच त्याला संजय गायकवाड यांच्यासह त्यांच्या कार्यकर्त्यांनी बुक्क्यांनी मारहाण केली. या घटनेनंतर एकच खळबळ उडाली असून, शिवसेना पक्षप्रमुख उद्धव ठाकरे यांनीही यावर भाष्य केलं आहे. उद्धव ठाकरे यांनी बुधवारी दुपारी विधिमंडळ परिसरात माध्यमांशी संवाद साधला. यावेळी गिरणी कामगारांच्या घरांचा मुद्दा, धारावी पुनर्विकासाचा प्रश्न तसेच शिंदे गटाचे आमदार संजय गायकवाड यांची कर्मचाऱ्याला मारहाण, अशा प्रश्नांवर उद्धव ठाकरे यांनी पत्रकारांना उत्तरे दिले. फडणवीसांना बदनाम करण्याचा प्रयत्न… संजय गायकवाड यांच्या कर्चचाऱ्याला मारहाणीमागे मुख्यमंत्र्यांच्या बदनामीचा कट असू शकतो, असा संशय उद्धव ठाकरे यांनी बोलून दाखवला. मुख्यमंत्री फडणवीस यांचा बदनाम करण्याचा प्रयत्न यामाध्यमातून असू शकतो, असे ठाकरे म्हणाले. अशा घटनांमागे षडयंत्र असू शकते, असे मला वाटते. एकनाथ शिंदे यांचा मुख्यमंत्री करा, असा दावा होता. परंतु ते मुख्यमंत्री बनू शकले नाहीत. म्हणून मग अशा घटना होतात का? हे पाहिले पाहिजे, असे ठाकरे म्हणाले. ही शिवसेना स्टाईल नाही… कर्मचाऱ्याला मारहाण ही शिवसेना स्टाईल आहे. जर कँन्टीन कर्मचारी त्यांचे काम नीट करीत नसतील तर पुन्हाही असेच मारेन, असे विधान मारहाणीनंतर गायकवाड यांनी केले. त्यावर ठाकरे म्हणाले, “ही शिवसेना स्टाईल नाहीये, मुळात गायकवाड हे शिवसैनिक नाहीत, ते शिंदे गटाचे आहेत. खऱ्या भाजपचा खून झालाय, गायकवाड सारखे लोक हत्यारे बसलेत की काय, अशी शंका येते”. असा टोला देखील त्यांनी लगावला.
