Bangladesh – बांग्लादेशात अल्पसंख्याक हिंदू समुदायाविरोधातील हिंसेच्या घटना थांबलेल्या नसून अलीकडेच समोर आलेल्या दोन वेगवेगळ्या घटनांमुळे तिथल्या अल्पसंख्याकांच्या सुरक्षेवर पुन्हा एकदा गंभीर प्रश्नचिन्ह निर्माण झाले आहे.

पहिली घटना मयमनसिंह जिल्ह्यातील भालुका येथील आहे. येथे ४३ वर्षीय हिंदू व्यक्ती रबेंद्र ऋषी यांची चाकूने भोसकून निर्घृण हत्या करण्यात आली. रबेंद्र हे सलून चालवत होते.

आरोपी सद्दाम हा बऱ्याचदा पैसे न देता सलूनमध्ये केस कापून घ्यायचा आणि ड्रग्स खरेदी करण्यासाठी रबेंद्र यांच्याकडे बळजबरीने पैशांची मागणीही करायचा.

मंगळवारी संध्याकाळी जेव्हा रबेंद्र यांनी त्याला फुकटात केस कापण्यास नकार दिला, तेव्हा संतापलेल्या सद्दामने त्यांच्यावर धारदार शस्त्राने हल्ला केला.

स्वतःचा बचाव करण्यासाठी जखमी रबेंद्र पळत जाऊन जवळच असलेल्या आरोपीच्या वडिलांच्या दुकानात आणि नंतर एका घराच्या अंगणात पोहोचला, परंतु आरोपीने त्याचा पाठलाग करून एकापाठोपाठ एक अनेक वार केले. अधिक रक्तस्त्राव झाल्यामुळे त्याचा जागीच मृत्यू झाला.

दुसरी घटना रंगपूर जिल्ह्यातील चक्र करीमपुर गावाची आहे. येथे सोमवारी रात्री एका सोशल मीडियावरील पोस्टवरून झालेल्या वादानंतर तीन हिंदू कुटुंबांच्या घरांमध्ये तुफान तोडफोड आणि लुटमार करण्यात आली.

ही घरे बिशू चंद्र महंता, जगदीश चंद्र महंता आणि दिनेश चंद्र महंता या तीन भावांची होती. उपद्रवी लोकांनी घरांचे दरवाजे, भिंती, फर्निचर आणि टीव्ही पूर्णपणे नष्ट केले. एवढेच नाही तर, घरात ठेवलेले मौल्यवान सामान आणि बिशू यांच्या दोन बकरीही ते सोबत घेऊन गेले.