Trisha Krishnan – दक्षिणेतील आघाडीची अभिनेत्री त्रिशा कृष्णन हिने तिच्या नावाविषयी करण्यात आलेल्या कथित घृणास्पद टिप्पणीवर जोरदार प्रतिउत्तर देत राजकीय वर्तुळात खळबळ उडवली आहे. तामिळनाडू भाजप अध्यक्ष नैनार नागेन्थ्रन यांनी टीव्हीके प्रमुख विजय यांच्यावर टीका करताना त्रिशाचा उल्लेख केल्यानंतर हा वाद निर्माण झाला. नागेन्थ्रन यांच्या वक्तव्यानंतर सोशल मीडियावर संतापाची लाट उसळली. अनेकांनी या वक्तव्याला वैयक्तिक आणि महिलांविषयी अवमानकारक ठरवत तीव्र निषेध नोंदवला. वाढत्या वादाच्या पार्श्वभूमीवर सोमवारी त्रिशाने तिच्या अधिकृत सोशल मिडिया अकाउंटवरुन वकिलामार्फत जारी केलेले खुले पत्र प्रसिद्ध केले. त्यात स्पष्ट करण्यात आले की ती कोणत्याही राजकीय पक्षाशी संबंधित नाही आणि राजकारणाबाबत नेहमीच तटस्थ भूमिका घेत आली आहे. निवेदनात म्हटले आहे की, राज्याच्या राजकीय क्षेत्रातील उच्च पदावरील व्यक्तीकडून अशा प्रकारची अयोग्य टिप्पणी होईल, अशी अपेक्षा नव्हती. माझी ओळख केवळ माझ्या कलागुणांनी आणि व्यावसायिक कामगिरीने व्हावी, अशी ठाम भूमिका अभिनेत्रीने मांडली. तसेच तिचे नाव असंबंधित राजकीय वादात ओढू नये, अशी स्पष्ट मागणी करण्यात आली. trisha krishnan त्रिशाच्या भूमिकेला अनेक चाहत्यांसह विविध स्तरांतून पाठिंबा मिळत असून, राजकारणात सभ्यतेची मर्यादा पाळली जावी, अशी मागणी जोर धरत आहे. सध्या या वादामुळे राजकीय वातावरण चांगलेच तापले असून, पुढील काही दिवसांत या प्रकरणावरून आणखी आरोप-प्रत्यारोप होण्याची शक्यता आहे. आधी त्रिशाच्या घरातून बाहेर पडावे… काही दिवसांपूर्वी तामिळनाडू भाजप अध्यक्ष नैनार नागेन्थ्रन यांनी टीव्हीके प्रमुख विजय यांच्यावर टीका करताना केलेल्या विधानाने संतापाची लाट उसळली होती. नागेन्थ्रन विजय यांच्यावर टीका करताना, विजय खूप निष्पाप आहे आणि त्याला राजकारण समजत नाही. राजकारण समजून घेण्यासाठी त्यांनी आधी घरातून बाहेर पडावे. तसेच, तामिळनाडूतील परिस्थिती समजून घेण्यासाठी त्यांनी आधी त्रिशाच्या घरातून बाहेर पडावे, असे वक्तव्य केले होते. त्यामुळे हा वाद निर्माण झाला होता. ही बातमी वाचा : Steve Smith : ऑस्ट्रेलिया संघाला दुखापतींचे ग्रहण! स्टार खेळाडू विश्वचषकातून बाहेर; अनुभवी स्टीव्ह स्मिथची संघात एन्ट्री
